Skulen blir heidra

Sauda Vekst deler ut prisen til ei medlemsbedrift som har utmerka seg gjennom heile året. Kven som skulle kårast til «Årets bedrift 2009» var for styreleiar Jan Alne ganske klart.

– Sauda vidaregåande skule var ein ganske klar kandidat. Dei tilfører Sauda-samfunnet viktig kompetanse og viser evne til omstilling. Det er stadig vekk behov for at vi i næringslivet blir utfordra på nokre kompetansefelt, og det gir skulen oss mulighet til, kommenterer styreleiaren.

Alne framhevar óg måten Sauda vidaregåande skule fyller si rolle som regional utviklingsaktør i Ryfylke.

– Fylkeskommunen har sagt at skulen skal vere deira svar på nettopp dette. Det har materialisert seg i mellom anna ei nyoppretta ambulanse-linje. I tillegg opna skulen i fjor haust eit nytt tilbygg som er gir elevar på tilrettelagt opplæring eit betre tilbod, noko som viser at ein satsar med pengar, ikkje berre med ord. Sauda vidaregåande skule har og tatt på seg oppgåva som driftsansvarleg for stadion, noko som vil vere ei vinn-vinn situasjon for dei og resten av Sauda-samfunnet, presiserer han, og legg til dei mange tilboda om skreddarsydd utdanning og partnarskapet med Inosa, som har ført til at skulen kan tilby dokumentert sikkerhetsoopplæring til yrkesfagelevar, og er tiltak som gjer skulen til ein klar vinnar.

Det ligg ei rekke kriterie til grunn for valet av Årets bedrift. Ein har mellom anna vurdert kvalitet, produktutvikling, nettverksbygging og evne til samarbeid, i tillegg til betydninga bedrifta har for lokalsamfunnet og næringslivet i kommunen. Den ferske leiaren i Sauda Vekst, Inge Løyning, er i likskap med styreleiaren overbevist om at dei har komme fram til ein verdig prisvinnar.

– Det er ikkje tvil om at Sauda vidaregåande skule treffer desse kriteria. Vi ønsker å satse på kompetanse, og Sauda er i denne samanheng lågt rangert i høve til dei kommunane vi kan samanlikne oss med. Vi ønsker å løfte oss, og der er skulen ein viktig bidragsytar. Årets bedrift 2009 er derfor heilt opplagt og ein solid og verdig vinnar, meiner Løyning.

– Det er ei stor bedrift med høgt utdanna arbeidskraft som bidrar i organisasjonslivet i Sauda, noko som gjer at dei er ein tilvekst til Sauda-samfunnet, supplerer Jan Alne.