Dyrlegesaka skal opp på nytt

– Eg har bedt om at saka som gjeld veterinær og driftstilskot skal takast opp igjen på ny. Først i formannskapet 10. februar, og så i kommunestyret 3. mars, opplyser ordførar Laura Seltveit.

Det var i desember i fjor eit samla kommunestyre vedtok å fjerne driftstilskotet på 150 000 kroner til dyrlege Rune Bratås. Han reagerte med å varsle at han vil avvikle dyreklinikken sin som ein følge av vedtaket. I tillegg har mange saudabuar  engasjert seg i saka, og ordføraren mottok i januar 500 underskrifter som ein følge av ein underskriftskampanje arrangert av ei støttegruppe for Rune Bratås.

Førre veke møttest Bratås, fungerande rådmann Alang G. Thompson og Laura Seltveit.

– Me hadde eit positivt og avklarande møte der begge partar fekk seie sitt. Nå ser me etter løysingar. Saka skal opp til politisk behandling, og tida vil vise om politikarane i kommunestyret er villige til å snu, seier Laura Seltveit.