Vanskeleg framkomst for renovatørane

Dei store snømengdene som kom i løpet av helga gjer renovasjonsarbeidet i Sauda ekstra utfordrande. Men huseigarane kan gjere jobben litt lettare for dei som skal tømme søppeldunkane deira.

– Huseigar har plikt til å sørge for at det er måka fram til dunkane. Ein ting er all snøen som ligg oppå dunkane, men det viktigaste er at vi kjem fram til dei. Arbeidet vårt er tungt nok i utgangspunktet, presiserer renovatør i Sauda kommune, Lars Tveitane.

Renovatøren understrekar at dei ikkje vil vere vanskelege viss det er nokon som har problem med å legge forholda til rette.

– Vi gjer unntak for eldre og uføre. Er det andre som har vanskeleg med å få måka, kan ein ta kontakt med renovasjonsbilen. Unge, friske og oppegåande menneske, derimot, skulle ikkje ha vanskar med å få orden på dette, seier Lars Tveitane, og legg til at dei og har forståing for at ikkje alle har måka etter snøfall på natta.

– Men når det er slik som det har vore i helga, då snøen fall natt til laurdag og søndag, då burde ein sørge for å måke i løpet av søndagen, meiner han.

Kvar veke tømmer renovatørane i Sauda kommune omlag 2 000 søppeldunkar. Viss renovatørane må brøyte seg fram til dunkane, risikerer ein at søpla ikkje blir tømt.

– Det er tungt å dra dunkane fram i snøen, og det er begrensa kva helsa vår tåler. Blir det ikkje måka, kan konsekvensen vere at vi køyrer rett forbi, åtvarar Lars Tveitane.