Politikarar føler seg forbigått

– Eg må seia eg blei veldig overraska då eg høyrde at denne uttalen var sendt utan at det var gjort ei politisk behandling av saka, seier Ivar Tangeraas, gruppeleiar for Høgre.

Elkem Saudaprosjektet sin planendringssøknad i samband med overføring av Reinsåna til Sandvatn blei eit heitt tema i kommunestyremøtet onsdag.

Den nemte overføringa ligg i utbyggingskonsesjonen, men nå har Elkem ombestemt seg og ønsker å fjerna denne delen frå prosjektet. I fjor haust blei derfor ein planendringssøknad sendt til Norges vassdrags- og energidirektorat (NVE). I desember blei saka sendt ut på høyring, blant anna til Sauda kommune. Sidan høyringsfristen gjekk ut alt 10. januar, forfatta administrasjonen ein uttale som blei sendt 7. januar. Ordførar Laura Seltveit grunngav dette med dårleg tid og ingen mulighet for å få saka behandla i eit kommunestyremøte før fristen gjekk ut. I uttalen skriv administrasjonen at Sauda kommune ikkje har nokon innvendingar mot at Elkem får lov til å sleppa å overføra Reinsåna.

Ivar Tangeraas er rysta over uttalen og meiner at administrasjonen går langt over sine fullmakter når dei sender ein slik uttale utan å informera politikarane om saka.

– Slike uttalar skal til politisk behandling, seier han bestemt.

I dag renn Reinsvatnet i Odda kommune naturleg ned i Håradalen og vidare ned til Røldalsvatnet, og vatnet blir brukt til kraftproduksjon av Hydro i Nesflaten og Statkraft i Hylen. Planen til Saudaprosjektet var opphaveleg å leia Reinsvatnet inn i Øvre Sandvatn slik at vatnet kan brukast til kraftproduksjon i Dalvatn kraftstasjon og i Sønnå kraftverk. Overføringa vil gi Elkem 10,1 GWh ny kraft. Men ettersom dei då stikk av med vatnet til Hydro og Statkraft må dei betala desse ein kompensasjon som tilsvarer 11,9 GWh. Ei overføring av Reinsvatnet vil dermed påføra Elkem eit tap på 1,9 GWh, og dei ønsker derfor sleppa å gjennomføra desse for dei ulønsame planane.

Ivar Tangeraas har ingen sympati med Elkem. Han meiner politikarane ikkje gjer jobben sin dersom dei godtar at Elkem endrar på konsesjonsgitte planar.

– Eg fattar ikkje at me kan la Elkem sleppa unna med dette. Dei plukkar bare ”indrefiletane” og vil sleppa å bygga ut delar av prosjektet som ikkje er lønsame for dei, seier han.

Høgrepolitikaren meiner dessutan at Sauda kommune vil tapa inntekter dersom Reinsvatn-overføringa blir tatt ut av Saudaprosjektet.

– Me taper anleggsinntekter, kraftinntekter og eigedomsskatt. Gir Elkem opp Reinsvatnet må dei kompensera Sauda kommune for tapte inntekter, meiner han.

Jostein Overskeid, som forfatta administrasjonen sin positive uttale, sa i kommunestyret at slik han såg det, vil ei ulønsamt overføring for Elkem derimot kunne føra til reduserte inntekter for Sauda kommune. 

Ordførar Laura Seltveit fekk i oppdrag å ringa NVE og undersøka om Sauda kommune kan få lov til å senda ein ny høyringsuttale, sjølv om fristen er gått ut.

– Me kan senda ein ny uttale direkte til departementet. Eg må sjekka om det er tidsnok med 3. mars eller om me må ha eit ekstraordinært kommunestyremøte før den tid, seier Seltveit.