Tråsavika og Øgreid Brygge vann fram

– Av erfaring veit me at namn på stader opptek mange og vekker kjensler, konstaterte Kjetil Rolfsen frå Arbeidarpartiet då kommunestyret onsdag skulle ta stilling til to spørsmål som hadde med stadnamn å gjera.

Rolfsen viste til at både tider og stader endrar seg og at det nokre gonger kan vera på sin plass med eit namnebytte.

– Me i Arbeidarpartiet har diskutert dette livleg, sa han, og vedgjekk at partiet ikkje stod samla i spørsmåla om namneformene Tråsavika/Trosavika og Øgreid Brygge/Øgreidkaien.

Høgres Dagfinn Birkeland, derimot, var ikkje i tvil om kva han meinte.

– Slik eg les det, endra kommunestyret i 1982 namnet Tråsavika til Trosavika. På folkemunne heiter det framleis Tråsavika, sa Birkeland, som ikkje såg nokon grunn til å endra på det innarbeidde Tråsavika-namnet.

– Og når det gjeld adressen på Øgreid-området synest eg me skal høyra litt på dei som bur der, argumenterte han.

Svein Ramsnes frå Senterpartiet meinte at Tråsavika er rette namnet.

– Det har vore diskusjonar mange stader om stadnamn. Me treng ikkje følga namnekonsulentane slavisk, sa kan.

Adressenamnet på dei nye husværa i Øgreid-området meinte han bør vera Øgreidkaien.

Wenche Øystese frå Kristeleg Folkeparti og Vegard Floa frå Venstre var einig med rådmannen og i tidlegare vedtak i kommunestyret som seier at Trosavika er rett namn.

Vegard Floa viste til at stadnamn i utgangspunktet er ein tradisjon, men at tradisjonar kan endra seg. Han ville velga å følga stadnamnnemda som sette namneforma Trosavika som rett form.

– I Øgreid-området meiner eg me bør høyra på dei som bur der, dei får bestemma sjølv, sa Venstre-politikaren.

Under avstemminga stemte Wenche Øystese, Vegard Floa og Ivar Øvrebø frå Arbeidarpartiet for namneforma Trosavika.

Fleirtalet bestemte dermed at staden heiter Tråsavika, og at det nye bustad- og hyttefeltet vest for denne staden heiter Tråsavikåsen.

Fleirtalet i kommunestyret bestemte vidare at dei to nye leilighetsbygga i Øgreid-området får adressenamnet Øgreid Brygge.

Her stemte Svein Ramsnes, Senterpartiet og Wenche Hoftun, Wenche Pleym og Hallgeir Amdal, alle Arbeidarpartiet, for namneforma Øgreidkaien.