Organisasjonar i leiarkrise

– Dette blir eit problem for lokalsamfunnet, seier Odd Magne Lønseth, avtroppande nestleiar i Sauda idrettslag.

Då årsmøtet til Sauda idrettslag var over tysdag kveld stod laget utan nye leiarar i fleire sentrale posisjonar. Medan hovudstyret manglar både leiar og nestleiar, har verken fotballgruppa, handballgruppa eller langrennsgruppa greidd å skaffa nye leiarar. Idrettslaget manglar ironisk nok også ny leiar av valkomiteen.

Ifølge Johnsen og Lønseth er det ikkje vanskeleg å få folk til å stilla opp på dugnad og ta på seg mindre verv som er direkte knytt til eigne ungar sine fritidsinteresser. Det er engasjement i eit større perspektiv det skortar på.

– Sauda idrettslag har i dag 755 medlemmer og eit breitt tilbod. Mange tar tilboda for gitt og tenker ikkje på at det ligg arbeid bak å drifta det, seier Johansen.

Den uløyste leiarkabalen gjer at Sauda idrettslag må kalla inn til eit ”fortsettande årsmøte”. Dei avtroppande leiarane blir sittande i verva sine inntil vidare.

Også den lokale golfklubben står i dag utan leiar.

– Me spurte veldig mange. Alle er positive, men folk vegrar seg for å ta på seg leiarvervet. Dei er redde for tidsbruken og for å ikkje strekka til, seier Laila Stødle i valkomiteen til Sauda Golfklubb.

Leiar av Idrettsrådet i Sauda, Knut Saua, meiner leiarproblema har med samfunnsutviklinga å gjera.

– Velferda vår har gjort folk meir egoistiske og dei prioriterer fritida si på ein heilt annan måte nå enn før. Folk kjøper seg fri frå dugnad og plikter med å trena på kommersielle treningssenter framfor å delta i eit idrettslag, meiner Saua.

Idrettsrådleiaren er også medlem i arbeidsstyret til idrettslaget Ny Von, som ikkje har hatt ein leiar av laget på fleire år. I dag blir leiaroppgåvene til idrettslaget i Saudasjøen fordel på fleire. Saua understrekar at også ein stadig aukande arbeidsbyrde for leiarar truleg er ein medverkande årsak til at folk kvir seg for å ta på seg verv.

I dag er snittalderen blant dei mest ihuga eldsjelene i lokale lag og organisasjonar høg. Saua fryktar ein d-dag når desse gir seg med sin dugnadsinnsats i både styre og stell og til gjennomføringar av praktiske dugnadsoppgåver.

– Mange av dei som er med i dag har vore med i årevis. Dei unge, dei som har ungar i laga, har travle dagar og kvir seg for å bidra til fellesskapet gjennom dugnadsinnsats. Men når dagens eldre eldsjeler gir seg, er det opp til dei unge om ein skal bevara laga eller legga dei i grus, åtvarer Saua.