Draumen om påverknad

Carina Tangeraas og Julie Arnfred Bojesen er inspirert etter å ha vore på sommarleir på Risøya i regi av Rogaland Sosialistisk ungdom (SU).

– Eg har vore med i SU sidan mai, seier Tangeraas, som klarte å lokke med seg venninna på sommarleir.

– Eg har eigentleg aldri vore særskild politisk engasjert. Då Carina spurde om eg ville vere med tenkte eg at det ville vere kjekt med leir, uansett, ler Bojesen, som blei positivt overraska over kor spennande politikk faktisk kan vere.

Sosialistisk ungdom er opptatt av ei rettferdig fordeling.

– Vi ønsker like mulegheter uavhengig av tjukkelsen på lommeboka, forklarer Tangeraas.

No håpar ho at ho og venninna kan bidra til at fleire ungdommar i Sauda engasjerer seg i politikken.

– Det er ingen lokallag for ungdom her, og eg trur mykje av grunnen til det er at ungdommen trur poltikk er kjedeleg. Viss ein snakkar deira språk om ting som opptar dei vil truleg fleire interessere seg, trur ho.

– Ja, det må vere gøy. Ikkje sånn at folk somnar. Det skal vere sosialt og plass til alle. Viss det blir sånn at det blir eit tiltak, då har ein ikkje lyst å vere med, meiner Julie Arnfred Bojesen.

Dei to håpar å kunne komme i gang med oppstartsmøtet til det nye lokallaget så snart som muleg.

– Tanken er å få til eit samarbeid med Sand og Vikedal, og kalle oss Ryfylke SU. Sauda SV og Rogaland SU har sagt dei skal hjelpe oss. Vi må vere tre aktive for å kunne starte opp eit lokallag. Eg vonar folk stiller for å høyre kva vi driv med. Liker ein det ikkje kan ein sjølvsagt velge å ikkje bli med, seier Tangeraas.

– Det viktigaste er at ein tør å engasjere seg. Mange forbinder kanskje politikk med nerdar, men det stemmer ikkje. Det såg eg veldig godt på sommarleiren til SU. Der var alle typar folk. Det nyttar ikkje å sitte heime og meine noko, ein må opp av sofaen! Bruk stemmeretten din, men orienter deg for all del på førehand. Kvardagen til ungdom kan påvirkast, seier Julie Arnfred Bojesen