– Ap-regjeringa kuttar kraftig i vern av Rogalandsnaturen

Dette rammar òg Rogaland direkte. I dei fire åra Venstre sat i regjering, frå 2017 til 2021, blei det verna over 42 000 dekar skog i fylket. I Sauda fekk me på plass ei utviding av Vikaneset naturreservat. Under Ap-regjeringa har tempoet stupt. I perioden 2021 til 2025 blei berre 8 500 dekar skog verna i Rogaland, fem gonger mindre enn då Venstre hadde ansvar for miljøpolitikken. Når innsatsen blir svekka så dramatisk, mistar me verdifull tid i kampen for naturmangfaldet. Gamal skog med rik artsflora blir hogd ned i staden for verna. Det skjer medan Ap-regjeringa snakkar varmt om natur og berekraft, men legg fram budsjett som dreg i motsett retning.

Frivillig skogvern er ei norsk suksesshistorie. Ordninga har gjort det mogleg å ta vare på verdifull skog på ein måte som både respekterer eigedomsretten til grunneigarane og sikrar biologisk mangfald. Over 1000 skogområde er verna gjennom ordninga, og meir enn 600 nye område, tilsvarande over éin million dekar, ligg no klare til vurdering for vern. Når regjeringa kuttar løyvingane så kraftig, risikerer me brems i arbeidet og eit nytt tillitsbrot overfor skogeigarane. Mange som alt har venta i årevis på ei avklaring, kan bli ståande utan svar, og motivasjonen til å tilby nye område for vern vil falle.

Over halvparten av alle truga artar i Noreg lever i skogen. Å kutte i skogvernet no er som å trekke ut kontakten midt i redningsarbeidet. Naturkrisa let seg ikkje løyse med festtalar og symbolpolitikk. Ho krev handling, stabile løyvingar og politisk vilje.

Venstre vil sikre pengar til naturvern og frivillig skogvern. Noreg kan ikkje møte naturkrisa med budsjettkutt. Me må møte henne med vilje, kunnskap og konkrete tiltak som faktisk verkar.