Dagens leiar: – Solid innsats av saudasamfunnet

Tysdag blei det for første gong arrangert Rosa sløyfe-løp i Sauda. Arrangementet har pågått over fleire år, ulike stader i Norge, og der inntektene frå løpet går til kreftsaka. Da det blei tatt privat initiativ til at løpet skulle bli arrangert i Sauda, viste saudasamfunnet på nytt sine store kvaliteter når det gjeld solidaritet og det å stille opp for andre.

Nær 300 vaksne møtte opp og registrerte seg, svært mange kledd i rosa for å vise si støtte til kreftsaka, også ein del menn. I tillegg møtte det opp svært mange barn og unge, som deltok gratis og dermed ikkje blei registrert. Totalt stilt derfor mellom 400 og 500 personar på arrangementet. Når arrangøren hadde håpa på 40-50 personar, seier det sitt. I norsk målestokk er 400-500 frammøtte i ein liten kommune som Sauda, svært imponerande.

Det som er ekstra imponerande er at kvar vaksen deltakar måtte betale 400 kroner for å vere med, da dette er pengane som skulle gå til kreftsaka.

Kreft er noko som dessverre rammer alle i Sauda, enten direkte eller gjennom at familiemedlemmer, kolleger eller venner blir kreftsjuke. Derfor var det også ekstra rørande å sjå mange deltakarar som stilte opp og som har kreftdiagnose i dag, eller som nyleg har hatt det. Også pårørande som nyleg har mista sine næraste til denne forferdelege sjukdommen deltok. Helsevesenet og forskarar slit med å knekke den medisinske koden» som kan redusere talet vesentleg når det gjeld kreftdiagnosar i samfunnet.

Derfor er det også viktig at det blir samla inn pengar til vidare forskning og ulike tiltak når det gjeld kreftsaka.

All ære til dei som tok initiativet, pluss alle medhjelparar til Rosa sløyfe-løpet i Sauda tysdag – men først og fremst takk til alle dei i Sauda som stilte opp og sørga for at arrangementet blei ein dundrande suksess.

Saudasamfunnet har all grunn til å vere stolte av seg sjølv, og som viser om og om igjen at solidaritet ikkje bare er tomme ord i Sauda.