Dei ressurssterke seniorane i Sauda

Publikum må kjøpe billett for å få plass. Skal du ha plass må du også vere tidleg ute. Dei kulturhistoriske arrangementa er som regel utselt, noko som er ein prestasjon. Sjølv om saudabuar er flinke til å støtte opp om ulike arrangement, er det likevel stor konkurranse om å lokke til seg kulturpublikummet.

25. november held Sauda sogelag årets siste møte. Da blir også Sauda sogelag sitt årsskrift presentert. For 45. gong gir organisasjonen ut eit årsskrift tettpakka med lokalhistoriske tema. For saudasamfunnet er det viktig at nokon tar på seg oppgåva med å vere historieformidlar. Kvaliteten på arbeidet som blir gjort er også svært god.

Eldsjelene i Sauda sogelag er ikkje bare seniorar. Dei er godt vaksne seniorar som har valt å bidra aktivt i lokalsamfunnet i staden for å sette seg ned i godstolen foran TVen, og bli sittande der. For saudasamfunnet er desse aktive seniorane ein viktig ressurs. Det er dyktige folk med aktive og gode yrkeskarrierer som har valt å bidra litt for Sauda.

Dei aktive eldsjelene i Sauda sogelag arrangerer ikkje bare kulturhistoriske møte med spanande tema, i tillegg til å gi ut sitt årlege tidsskrift i bokform. Dei bidrar også aktivt i samfunnsdebatten. Nyleg har dei levert høyringsuttale om budsjettforslaget til kommunedirektøren, pluss høyringsuttale til settefiskplanane til Sauda Aqua i Sønnåhamn.

Da Sauda sogelag fylte 40 år ville dei i anledning jubileet gi ei gåve til saudasamfunnet. Med god støtte frå Sparebankstiftelsen Sauda spanderte dei ei skiltløype i Åbøbyen. 15 forseggjorte skilt med lokalhistorie er plassert rundt i Åbøbyen. Absolutt verdt ein tur for dei som ennå ikkje har tatt turen. Fleire kulturhistoriske bygg i Sauda har også fått blå skilt», som gir kort informasjon om bygget. Eit nytt kulturhistorisk initiativ i regi av det aktive sogelaget.

Etter at fagbokhandelen blei lagt ned i Sauda, tok Sauda sogelag også initiativ til å selge lokale bøker. Nyttig for både forfattarane og kjøparane, i mangel på ein arena.

Sauda har mange aktive seniorar som bidrar stort og er ein viktig ressurs for lokalsamfunnet. Dette gjeld ikkje bare i Sauda sogelag, men i ei rekke lag og organisasjonar i Sauda. Fleire av desse seniorane utfører også viktig samfunnsoppgaver for saudasamfunnet. Å skulle ramse opp alle ville fort ført til at fleire ville bli gløymt. I denne leiaren er det Sauda sogelag som velfortent skal få lov til å skinne. Men alle dei ressursfulle og viktige seniorane som legg ned ein stor innsats for lokalsamfunnet fortener ein stor takk, og dei har all grunn til vere stolte over innsatsen dei gjer til det beste for Sauda.