– Flott Eldredag,» men inga eldrebølge i Sauda?

FN vil gjerne ta seg av alle, nå også med eigen Eldredag, i førre veke arrangert for første gong i Sauda. Vilmer Teig åpna møtet med fantastisk pianospel, og Nansy Lund, leiar i Eldrerådet, ønska velkommen med fine tankar om å bli eldre.

Ordførar Håvard var sjølvsagt på plass med ei historisk og humoristisk helsing, vel førebudd som alltid.

Eldrerådet hadde henta inn spesialkompetanse for å presentera faglege tema for eit aldersvennleg lokalsamfunn, og først ut var Susanne Yksnøy, psykolog og folkehelsekoordinator. Ho orienterte om samfunnets utfordringar ved høgare levealder og viste film frå Sola kommune som har kome langt i ein slags likestilt dialog med 62+. Me fekk også gode tips for livskvalitet, kvardagsglede og betre psykisk helse.

Ann Kristin Nordvik, einingsleiar ved tildelingskontoret, snakka om bustadplanlegging for eldre som helst vil bu heime så lenge som mulig. Ein ny trend viser likevel at mange i aldersgruppa 60-75 vel å flytta til meir aldersvennlege bustader med minimalt vedlikehald. Her er det hjelp å få med økonomi, tilskot, hjelpemiddel, lys, rekkverk, tepper og dørbreidde. Ein ergoterapeut kan bidra med råd og tips, og i siste instans er det viktig å finna ut om vedkomande har eit nettverk i nærleiken.

Så kom fysioterapeut Helene Fjellheim Midthun på scenen med klare meldingar om fysisk aktivitet.

– Ikkje gå i dvale som PC-en, kom deg opp av godstolen, prøv å læra noko nytt og aller helst: Kom deg ut og driv litt styrke- og balansetrening!

Me fekk også ei kort, spontan treningsøkt før Nansy avslutta med ein velkjend sketsj frå Dizzie Tunes for å understreka at humor og latter aldri blir feil.

Konklusjon: Eit nyttig møte for oss pensjonistar, men kor var så tsunamien av Saudas eldre?

Medan Amy bygde seg opp med sterke vindkast og høg sjø, representerte dei 30 frammøtte knapt ein svak krusning av den lenge varsla eldrebølga. Det kan vera uttrykk for at Saudas mange eldre førebels kanskje kjenner seg spreke og meir som ein ressurs enn ein byrde (ingenting er betre). Personleg trur eg det viser at vår aldersgruppe har det utruleg godt i Sauda, og det har me all grunn til.

Ein siste observasjon: Ordføraren sine to timar på Alfred annankvar fredag er eit glimrande tilbod, men dei siste vekene har han knapt hatt besøk. Folk i Sauda har altså lite å spørja om og klaga på!

Til slutt eit tips for blodtrykket og humøret: Ikkje høyr på Trump og ignorer den norske folkesporten, syting og klaging frå mange yrkesgrupper og deira fagforeningar. Dei er jo så slitne, har det så fælt og får visst knapt løn.

Kåre Rød – 72