Leiar: – Sauda kommune må løyse problemet

Bygget Saudahjørnet, midt i Sauda sentrum, har blitt eit evigvarande problem som aldri blir løyst. Som ein verkebyll står det store murbygget til forfall midt i glaninga på alle som besøker eller kjører gjennom sentrum. Bygget er i dårleg forfatning og sikkerhet har vore eit kontinuerleg tema. Bygget har fleire gonger blitt sperra av etter sikkerhetsvurderingar utført av offentlege instansar.

Hausten 2022 vedtok Sauda kommune løpande dagbøter fordi byggeigaren ikkje hadde etterkome kravet om at fagkyndige undersøker bygget og deretter dokumenterer at bygget er trygt. Da dagbøtene hadde passert 100 000 kroner vedtok Sauda kommune i juni 2023 å bestille sikringsarbeid av bygget på huseigarens rekning. Nå har igjen området rundt bygget blitt sperra av på grunn av sikkerhet.

Bygget er også til stor sjenanse i Sauda sentrum. Forfallet er tydeleg, vedlikehaldet ikkje-eksisterande og næringslokala i 1. etasje består av ein konkursramma klesbutikk, der kleda framleis er i lokala og der det ligg velta utstillingsdokker i vindauga. Det ser rett og slett ikkje ut og det er skjemmande for Sauda sentrum.

Klesbutikken blei slått konkurs i mars 2021. Innehavaren av klesbutikken var den same som eig bygget framleis. Han møtte ikkje opp til konkursbehandlinga to gonger på rad. Eigaren bur ikkje i Sauda kommune.

Å seie at Sauda kommune ikkje har prøvd å løyse denne utfordringa, blir feil. Kommuneadministrasjonen har prøvd dette, men utan å lykkast. Privat eigedomsrett er beskytta og dei juridiske verktøya er avgrensa. Byggeigaren framstår som heilt utan evne og vilje til å sette bygget i ein akseptabel tilstand, uansett kva Sauda kommune måtte vedta.

Ei juridisk løysing er langvarig og komplisert. At Sauda kommune heller prioriterer å presse hardt for å få byggeigaren til å selge til kommunen, er den raske og praktiske løysinga. Deretter får kommunen finne rette kjøpar til bygget.

Etter mange år med uthaling av tid og store frustrasjonar frå nærliggande forretningsdrivande i Sauda sentrum, pluss ei stadig bekymring for sikkerheta rundt bygget, er ei handlekraftig løysing sterkt etterlengta.