Leiar
Mange bekkar små…
I Ryfylke denne veka kan ein lese om noko som for saudabuen kan verke som ein heilt naturleg del av kvardagen, nemleg om fritidstilbod, lag og organisasjonar med frivillige eldsjeler som jobber på dugnad, bygger, inviterer, steller i stand og serverer.
På Vetrhus deltok Sauda jeger- og fiskerforening søndag i aksjonen Hele Norge spiser ute», eit tiltak for å fremme naturopplevingar og oppmuntre til bruk av tilgjengeleg natur, denne gong gjennom matopplevingar ute. Dette kunne SJFF løyst med saft, grillpølser og ketchup, noko dei fleste ville ha tenkt var grei bål-mat». Enkelt og godt nok.
I staden stilte dei engasjerte friluftsentusiastane med ein trerettars meny, beståande av spekeskinke og mango, viltgryte med reinsdyr og hjort, samt heimelaga dessert med banan, marshmallow og bringebær. Pris? Null kroner. Det er like imponerande og prisverdig, som det var velsmakande for saudabuen som møtte opp. At maten blei servert på det nyleg opparbeidde gapahuk-området, understrekar bare poenget; Sauda har eit ekstremt sterkt organisasjonsliv med ekstremt engasjerte menneske. Det skal vi ikkje gløyme å vere takksame for.
Annonse
Ola Breivik kunne ha laga viltgryte med kjøtdeig og Toro-posar. Han valde å lage den med sjølvplukka sopp, reinsdyrkjøt frå Valdres og hjort frå Fattnes. Det seier mykje.
Litt meir sentralt i Sauda er det ein annan gjeng som også har spennande dagar. I dagens avis kan ein lese om Sauda klatreklubb, som i disse dagar er i ferd med å ferdigstille sitt drøymeprosjekt, Klyv Klatresenter, som ligg i samband med Saudahallen, med fleire buldrerom og klatreveggar opptil 16 meter høge.
Når Ryfylke har snakka med dei involverte i prosjektet, er det ikkje sine eigne klatreopplevingar i dei enorme veggane dei fortel mest om. Det er ikkje adrenalinrushet dei trekk fram når avisa spør om kva dei gler seg mest til når klatreparken er ferdig. Dei fortel nemleg at det først og fremst handlar om å gi fleire mulegheit til å ha glede av klatring. At fleire får mulegheit til å ta del i klatrefellesskapet. Også det seier mykje.
Då Ryfylke intervjua ein av saudabuane som deltok på Hele Norge spiser» på Vetrhus, brukte han ordtaket mange bekkar små», og sa at det er alle dei små kvardagsgledene, dei små fellesskapa og arrangementa som gjer Sauda til ein så fantastisk stad å bu. Han er nok inne på noko.
