Meiner det er på tide at Norge går inn i EU

Norge blir omfatta av toll på jernlegeringar. Dette er dramatisk for norsk industri og for Rogaland. Det betyr at arbeidsplassar hos Eramet i Sauda og andre viktige hjørnesteinsbedrifter står i fare. For ei bedrift som allereie står midt i ein krevjande konkurransesituasjon med høge kraftprisar og uforutsigbare rammevilkår, er dette svært alvorleg.

Ap-regjeringa har i månadsvis forsikra både industrien og Stortinget om at dette ikkje ville skje. No skjer det likevel. Dei har stått på sidelina medan EU har førebudd tiltak som direkte rammar norsk industri. Det er eit politisk svik mot bedrifter som skaper arbeidsplassar og verdiar i heile landet.

Venstre har lenge åtvara mot denne passive lina i europapolitikken. Norge treng ei regjering som evnar å vere til stades der avgjerdene blir tekne, og som byggjer tillit og samarbeid i Europa i staden for å stå utanfor og håpe på unntak.

Denne saka viser òg kor sårbare vi er når Norge står utanfor EU. EØS gir oss marknadstilgang, men ikkje reell påverknad når viktige avgjerder blir tekne i Brussel. Vi endar som passive mottakarar av reglar som får store konsekvensar for norsk næringsliv. Venstre vil at Norge skal vere der avgjerdene blir tekne, ikkje berre stå igjen og handtere konsekvensane etterpå.

I møte med ei meir uforutsigbar verd treng Norge meir samarbeid med Europa, ikkje mindre. Difor seier Venstre ja til EU og ja til ei ny folkerøysting. Norge treng ei ny retning i EU-politikken før vi mistar endå fleire moglegheiter og arbeidsplassar.

Kjartan Alexander Lunde, gruppeleiar i Rogaland Venstre