Møt opp og diskuter budsjett

Tankegangen er at innbyggarane kan både spørre og meine noko om budsjett, kommuneøkonomi og prioriteringar og der alle dei politiske partia i kommunestyret er representert.

Initiativet er godt, for da kan innbyggarane møte mange i staden for å springe rundt. Samtidig er det nok ikkje alle typar budsjettdiskusjonar som passar dette formatet. Enkelte samtalar og innspel passar nok best i små diskusjonsfora utan open mikrofon.

Tidspunktet for dette folkemøtet er bra. For alt 19. november skal formannskapet vedta si budsjettinnstilling til kommunestyret. Det betyr at før denne datoen begynner partia å gjere seg opp ei meining om kva som bør vere budsjettprioriteringane. Skal ein påverke desse prioriteringane bør det derfor helst skje før 19. november, sjølv om det ikkje er umuleg å påverke etter denne datoen. Men 10. desember blir 2026-budsjettet vedtatt av kommunestyret. Prøver ein ikkje å påverke og ytre seg om kommuneprioriteringane, får klaging mindre kraft. Det same gjeld skryt!

Årets budsjettforslag frå kommuneadministrasjonen er ikkje det mest dramatiske. Hovudgrunnen til dette er at neste års kommuneinntekter ligg an til å bli store nok til å dekke dagens driftsutgifter, pluss dekke opp ein akseptabel driftsmargin. Grunnen til dette er at også neste år vil gi Sauda kommune unormalt høge kraftinntekter, truleg det tredje høgaste kraftinntektåret gjennom tidene.

Ulempen med budsjettforslaget er at det er nettopp unormalt høge kraftinntekter som berger drifta av kommunen. Kommunedirektør etter kommunedirektør i Sauda har påpeika denne utfordringa, og kommunestyrepolitikarane har over ei rekke år uttalt at dei er klare for å ta ein del grep som frigjer nokre av kraftinntektene frå drifta.

Der er ein framleis ikkje. Det blir urettferdig å seie at det ikkje er gjort enkelte sparegrep opp gjennom åra. Det er det. Og det pågår prosessar der ein skal sjå på framtidas oppvekstsektor og helse- og velferdssektoren i Sauda kommune, nettopp for å kunne ta driftsgrep. Sauda vil møte demografiutfordringar.

Men framleis er det langt igjen. Sauda kommune er frykteleg avhengig av at kraftinntektene er godt over snittet. Det er det lett å gløyme etter tre gode kraftprisår.