Nytt budsjett: Vil freden vare?

I dag, torsdag ettermiddag, held Saudas konstituerte kommunedirektør sin budsjettpresentasjon. Deretter blir det opp til lokalpolitikarane å justere dette budsjettet ut ifrå sine prioriteringar.

Det er framleis stor politisk vilje i kommunestyret til å fortsatt frigjere driftsutgiftene frå kraftinntektene til Sauda kommune. For få år sidan var det ikkje vanskeleg å finne motivasjon for dette. Budsjettrunde etter budsjettrunde var ein evig kamp for å få eit budsjettvedtak i null, og helst med eit lite overskot. Dette skjedde år etter år. Ustabile kraftinntekter skapte for store svingningar og det var vanskeleg å drifte Sauda kommune utan opprivande diskusjonar om kutt i tenestetilbodet.

Dei siste par åra har det vore enkelt å få budsjetta til å gå i solid pluss, på grunn av ein tragisk krig i Ukraina. Kraftprisane har gått opp og det profiterer kraftkommunen Sauda på.

2023 og 2024 gav skyhøge driftsoverskot. Også 2025 ligg an til ein grei pluss, men riktig nok med lågare overskot enn dei to åra før. Spørsmålet blir kor kraftprisdopa» torsdagens budsjettpresentasjon blir. Truleg kan ein forvente gode kraftinntekter også i 2026. Blant anna har Sauda kommune alt selt konsesjonskrafta for neste år. Ifølge siste tertialrapport har dette salet gitt 12 millionar kroner i meirinntekt samanlikna med året før.

Spørsmålet er om dei gode kraftinntektene over tid vil friste lokalpolitikarane til å forlate sparetankegangen?

Det neste spørsmålet er om det politiske klimaet i kommunestyret igjen blir utsett for slitasje? 2024 var eit utmattande år politisk, som kulminerte med at ein Ap-representant braut ut av partiet og gruppa. Dermed enda kommunestyret opp med to like store bolkar, og ein uavhengig representant i midten. Etter at partia blei einige om eit budsjettforlik i desember 2024, har det politiske klimaet vore betre i 2025, noko partia skal ha honnør for med tanke på den polariserande ammoniakkdebatten som har prega saudasamfunnet og politikken.

Det blir spennande å sjå om denne budsjettprosessen klarer å vedlikehalde det politiske klimaet som lokalpolitikarane etter kvart har klart å opparbeide seg.