Ope brev til politikarane i Sauda: – Me er uroa for manglande terapitilbod i varmtvassbasseng

Styret i Sauda/Suldal Revmatikarlag er framleis uroa for manglande terapitilbod i varmtvassbasseng for medlemmane våre i Sauda. Ingenting er gjort etter at tilbodet i terapibassenget på Frisk og Rask vart lagt ned. Me undrar oss på kva kommunen skal med ein kommuneplan om ein ikkje fylgjer opp måla i planen.

I kommuneplanen 2019-2031, ser me at kommunen skal førebyggja og redusera utvikling av helseplager og sosiale vanskar, og driva helsefremjande og førebygjgande arbeid.

Kommunen skal dreia ressursane mot utsette grupper som står i fare for å utvikla langvarige og alvorlege helseplager. Ved å setja inn tiltak så tidleg som mogleg, vil ein kunne minska konsekvensane av helseplager og fremje meistring helse og livskvalitet hos alle innbyggjarane. Sauda kommune skal ha fokus på folkehelse og fremje sunne levevanar, og leggja til rette for at innbyggjarane tek ansvar for eiga helse, tek sunne val og meistrar eige liv.

Trening/terapi i varmtvassbasseng for revmatikarar og dei med muskel- og skjelettlidingar er eit godt døme på tiltak ein kan gjennomføra for å nå desse måla. Tidleg innsats vil kunne minska konsekvensane av helseplager og kan gjera denne gruppa meir sosial og fysisk aktive i kvardagen. Det er altså ikkje berre gunstig for den mentale helsa, men kan og føra til betre funksjonsevne og samfunnsdeltaking. Ein klarar meir sjølv, og kan kanskje bu lengre heime.

I kommuneplanen står det vidare at Sauda kommune skal prioritera innsats som reduserer sosiale forskjellar slik at innsatsen når dei med høgast risiko for redusert samfunnsdeltaking og funksjonsevne. Revmatikarane er blant dei gruppene som er mest utsett for dette, og kan lett verta sosialt isolerte.

Sauda/Suldal Revmatikarlag arbeider difor med å få til ei ordning med trening/terapi leia av fysioterapeut i utebassenget i Sauda for medlemmane våre. Revmatikarlaget er heilt avhengig av eit samarbeid med Sauda kommune for å gjennomføra tiltaket. Difor ber me saudapolitikarane tenkja langsiktig og prioritera dette viktige folkehelsearbeidet i budsjettet for 2026.

For styret i Sauda/Suldal Revmatikarlag, Kristine Langøy

Sollaug S. Steine (leiar)

Toril F. Kvæstad,

Aasne Hagen,

Kjell Steinar Andersen,

Venke Nordmark,

Kirsti Eilertsen.