Ufin oppførsel skal bli slått ned på

Måndag blei reguleringsplanen til Iverson eFuels vedtatt med ti mot ni stemmer. Eit todelt kommunestyre illustrerer godt eit todelt saudasamfunn i synet om det skal byggast ein ammoniakkfabrikk på Birkeland, med lagrings- og utskipingsanlegg ved Saudafjorden.

Det som er viktig å merke seg er at det framleis er langt frå sikkert at det nokon gong vil kome ein ammoniakkfabrikk i Sauda. Kommunestyret har godkjent at eit areal på Birkeland, og nede ved Saudafjorden, kan bli brukt til dette formålet dersom prosjektet i framtida blir gjennomført. Det er eit stykke fram dit.

For at ammoniakkfabrikken skal bli bygd, må Iverson eFuels fatte ein investeringsbeslutning. Dette er ikkje gjort. Dersom Iverson eFuels skal fatte ein investeringsbeslutning må marknaden vere villig til å ta i bruk grøn ammoniakk. Akkurat i dag er det liten interesse for dette produktet. Ein grunn til dette er at grøn ammoniakk er svært mykje dyrare enn vanleg framstilt» ammoniakk. Iverson eFuels trur det kan bli ein marknad for dette i framtida, sidan skipsflåtens enorme klimautslepp blir sett på som eit globalt miljøproblem. Men for at grønn ammoniakk skal bli eit realistisk alternativ for skipsflåten, må det store subsidieordningar på plass. Desse ordningane er på ingen måte på plass, og det er snakk om store pengebeløp. Ingen i dag trur at kundane er villige til å betale full» pris for grønn ammoniakk med det første. I marknaden er det også svært delte meiningar om kva som skal vere framtidas løysing når det gjeld drivstoff til skipsflåten. Det dei er einige om er at skipsflåten forurensar.

Men sjølv om det er stor usikkerheit om det i det heile tatt blir bygd ein ammoniakkfabrikk i Sauda, må likevel saudasamfunnet ta inn over seg at reguleringsplanen til Iverson eFuels har blitt godkjent og vedtatt av kommunestyret.

Etter at ein langvarig ammoniakkdebatt kulminerte i eit reguleringsplanvedtak i eit langt kommunestyremøte måndag, gjekk politikarane etterpå ut til eit felles måltid. Lokalpolitikarane har vore sterkt ueinige, ikkje bare mellom partia, men også innad i fleire parti. Ein felles middag i sosialt lag, og einighet om å begrave stridsøksene, er ein vaksen måte å gjere det på.

Det har også gått tidvis hardt for seg på sosiale media når ammoniakkfabrikk har blitt debattert. Redaktøren i Ryfylke tar eit oppgjer i dagens avis med delar av debattmiljøet i Sauda. Det gjeld dei som sprer uriktig informasjon og som oppfører seg direkte ufint.

Desinformasjon, personangrep, oppfordring til sivil ulydighet og å angripe lokalmedia med påstandar om løgn og skjult agenda, er alvorleg, sjølv om ei lokalavis skal vere tjukkhuda og tåle eit kritisk lys. Dette er noko som lokalsamfunnet skal slå ned på, uansett om ein er for eller mot planane om å bygge ein ammoniakkfabrikk i Sauda.