– Ut av Facebook og inn i fellesskapet?

I Sauda i dag er det nesten umogleg å følgja med på kva som skjer utan å vera på Facebook. Konsertar, møte, dugnader og kurs blir lagt ut der.

Men kva med dei som ikkje brukar Facebook? Dei som har sletta kontoen, aldri hatt ein, eller som rett og slett ikkje orkar å delta på ein bråkete» plattform som først og fremst eksisterer for å tene pengar på merksemda vår?

Når all lokal informasjon samlast på Facebook, oppstår det problem. Me overlet den lokale informasjonsstraumen til eit selskap styrt frå andre sida av Atlanteren, med heilt andre interesser enn vårt lokale fellesskap. Samtidig stenger me ute mange frå bygdelivet. Det er rart at ein skal inn på ein kommersiell amerikansk plattform for å finna ut når korpset har basar, eller når idrettslaget arrangerer dødsekonkurranse.

Dette er ikkje kritikk av korpset eller idrettslaget, dei fortener applaus for alle sine arrangement. Eg er heller ikkje betre sjølv. Eg har brukt Facebook til å reklamera og annonsera i ei årrekkje. Det er både billig og enkelt, og ein når mange på kort tid. Samtidig har det altså kostnader for lokalsamfunnet vårt.

Ser me teikn til endring? Etter påtrykk frå innbyggjarar har kinoen byrja å annonsera i lokalavisa igjen og har fått opp programmet sitt i ein monter ved Rådhusplassen. Det er rett og slett forbiletleg. Kanskje dette kan vera starten på noko større?

Tenk om me kunne fått til eit felles løft der lokale arrangørar og lag i større grad får informasjonen ut både i lokalavisa og på fysiske tavler i sentrum.

Dette handlar om meir enn informasjon. Det handlar om fellesskap, inkludering og eigarskap til vår eiga lokale offentlegheit.

La oss ta Sauda ut av Facebook, og inn i lokalavisa og skjermar og tavler i sentrum.