109 avlspurker, 39 mjølkekyr og 2 981 søyer…

Våren 2022 gjennomførte statsforvaltaren i Rogaland ein såkalla forvaltningskontroll med ulike støtteordningar i landbruket som tema. I sluttrapporten blir det presentert i alt ti forhold statsforvaltaren meiner Sauda kommune må retta opp i. Funna omhandlar i hovudsak utilstrekkelege eller manglande rutinar for å sikra at tilskotsordningane blir forvalta i tråd med regelverket.

– Det ligg i forvaltingskontrollen sin natur at ein leitar etter feil og manglar. Me ser på slike kontrollar som ein mulegheit til læring og kjem nå til å setta i verk tiltak for retta opp i dei manglane som er avdekka, seier konstituert kommunedirektør Eirik Daniel Fatnes i ein kommentar.

Låg ressursbruk

I rapporten kjem det fram at statsforvaltaren oppfattar kommunen sin ressursbruk til landbruksforvalting er i snauaste laget:

– Kommunen har i dag ei 60 prosent stilling til landbruksforvalting. Statsforvaltaren meiner at arbeidsoppgåvene som er knytt til denne jobben utgjer ei 100 prosent stilling. Kommunen bør vurdera å auka denne stillingsprosenten.

– Me er godt kjend med at vår ressursallokering i dag er på eit minimum. Landbruksrådgivar er tilsett i 100 prosent stilling, men er leigd ut til Suldal i 40 prosent stilling. Dette er sett på som ei god ordning som gjer at vår landbruksrådgivar får vera ein del av eit større fagmiljø, forklarer Fatnes.

Han opplyser vidare at landbruk ligg under plan- og forvaltingsavdelinga i kommunen, og at avdelinga bidrar inn i arbeidet som ligg til landbruk sitt ansvarsområde.

Får ros for lokalkunnskap

Trass dei ti funna som skildrar manglar eller forbetringspunkt ved den lokale landbruksforvaltninga, får Sauda kommune også ros for sitt arbeid.

– Vår vurdering er at kommunen har gode skriftlege rutinar for si saksbehandling. Stor lokalkunnskap, også om enkeltbruk, gir kommunen god oversikt og eit godt utgangspunkt for saksbehandlinga, skriv statsforvaltaren.

33,7 årsverk

I 2021 blei det betalt ut i overkant av 12,5 millionar kroner i produksjons- og avløysartilskot til i alt 56 søkarar i Sauda.. Verdiskapinga i jordbruk og skogbruk var på 16,2 millionar kroner og næringa står for ei sysselsetting tilsvarande 33,7 årsverk.

I kommunen var det per 1. oktober 2021 3 033 dekar fulldyrka eng, 358 dekar overflatedyrka eng og 3 997 dekar innmarksbeite, ifølge rapporten.

Husdyr i Sauda per 1. oktober 2021: