25 saudabedrifter fekk kommunal straumstøtte i første kvartal

I januar vedtok kommunestyret at Sauda kommune skulle gi lokal straumstøtte til bedrifter i Sauda. Totalt ti millionar kroner blei sett av til straumstøtte for 2023. Dette beløpet vil av politikarane bli redusert, både fordi straumprisane i 2023 ikkje har blitt så høge som frykta, men også fordi politikarane ser behovet for strammare kommunal økonomistyring.

Fristen for saudabedrifter til å søke straumstøtte for månadane januar, februar og mars gjekk ut 26. mai. Sauda kommune opplyser nå at totalt 25 saudabedrifter har fått innvilga straumstøtte for årets tre første månader. Samla har desse bedriftene fått 622 000 kroner i støtte.

Aller mest har glasfabrikken SI-Glass fått med 109 500 kroner i støtte. Deretter Sauda Skisenter med 68 400 kroner. Dei to industribedriftene Djuvik Maskinering og Weldone har fått 66 700 og 59 000 kroner. Overnattingsbedriftene i Sauda i form av Sauda Fjord Camping, Kløver Hotel og Sauda Fjordhotell har fått 40 500, 37 300 og 31 400 kroner i støtte. R.B Handel, som er Bunnpris-butikken i Sauda, har fått 33 500 kroner. Dei resterande bedriftene har fått frå 28 000 kroner og ned til nokre tusenlappar.

Neste søknadsfrist for Sauda kommune sin straumstøtte går ut 21. august. Da kan ein søke om støtte for månadane april, mai og juni.

Meiner det ikkje burde ha vore tak på støtteordninga

SI-Glass får desidert mest i kommunal straumstøtte, men kunne fått dobbelt så mykje viss det ikkje var tak på støtteordninga.

SI-Glass-leiar Lars Sigve Søndenå er svært glad for at Sauda kommune bidrar med straumstøtte til lokalt næringsliv.

– Me er svært fornøgd med at me får støtte og flott at Sauda kommune har innført dette. Men me hadde helst sett at det ikkje var eit slikt tak på støtteordninga. Sidan me bruker svært mykje straum er det kun halve straumforbruket vårt som blir lagt til grunn når støtta blir rekna ut, seier Søndenå.

Med andre ord ville SI-Glass fått ein god del meir i støtte for dei tre første månadane dersom nivået på maksforbruket blei dobla.

– Sauda kommune sette av ti millionar kroner til støtte. Sjølv om dette beløpet blir redusert, ser det ut til at kun ein mindre del av beløpet blir brukt når kommunen betaler 600 000 kroner i støtte i første kvartal. Det er om vinteren straumforbruket er høgast, seier Søndenå.

Han opplyser at den faktiske straumrekninga er mange gonger høgare enn kva dei får i støtte.

– Kun SI-Glass oversteig taket

Dagleg leiar i For Sauda KF, Harald Halvorsen Løland, opplyser at SI-Glass var einaste søkar som hadde høgare straumforbruk enn maksgrensa.

– Når eg ser straumforbruket deira forstår eg at det har vore tøft for bedrifta når straumprisane var på det høgste. Grunnen til at det blei innført eit tak var at ein ikkje visste korleis straumprisane ville utvikle seg. Derfor måtte ein sette grenser slik at ein var sikker på at pengane strekte til, seier Løland.

Han erkjenner at modellen kanskje kunne vore annleis, men at det er lettare å seie i ettertid enn i forkant. Samtidig minnar han om at det også er oppretta ei generell støtteordning til lokale bedrifter og at det ikkje er umuleg at SI-Glass kan bli vurdert i denne ordninga.

– Men det kan eg ikkje uttale meg om i forkant. Denne støtta vil ikkje bli avgjort før i august, sidan det er styret i For Sauda KF som skal vedta kven som får støtte, opplyser Harald Halvorsen Løland.

Straumstøtte Sauda kommune første kvartal 2023: