Besøkte potensiell gondol-leverandør: – Svært god kvalitet over heile linja

Tre selskap har levert tilbod på leveranse av den første planlagte gondolbana i Sauda. Det italienske selskapet Leitner, det østerrikske selskapet Doppelmayr og det franske selskapet MND har alle levert tilbod til Folkeheisen Sauda AS. Denne veka besøkte dagleg leiar Kristian Landro den franske leverandøren saman med skisenterets Lars Reidar Fosstveit.

– Det var eit positivt besøk. Alle leverandørane har gitt tilbod på kun éin heis, og vi har fått forklart for MND at det på sikt vil dreie seg om to gondolbanar i Sauda, slik at dei kan justere tilbodet sitt. Dei var veldig interesserte i å vise oss kva dei leverer, og det fikk vi sett. Inntrykket er at dette er svært god kvalitet over heile linja, noko som også er inntrykket dei andre leverandørane har gitt. Målet er at leverandørane har så gode og like tilbod at det til slutt er kun prisen som skil dei, seier Landro.

– Ikkje i mål

MND er eit selskap med meir enn tretti års erfaring med leveransar av både gondolbanar, berg- og dalbanar og andre typar installasjonar som for eksempel zip-line. I den pågåande anbodsprosessen er prisane frå dei tre selskapa ikkje informasjon som Folkeheisen Sauda røper, men Landro seier at alle dei tre tilboda ligg innanfor den opprinnelege kostnadsramma på 90 millionar kroner for den første heisen.

– For oss var det også viktig å forklare for selskapet kva som er status for dette prosjektet i Sauda. Det er framleis lause trådar. Områdeplanar som må behandlast. Finansiering som må løysast. Vi er ikkje heilt i mål, og det er viktig at leverandørane er klare over. Samtidig er det viktig at vi jobbar på fleire frontar på same tid, både her heime og mot dei potensielle leverandørane, seier Landro.

Svak krone

Den økonomiske usikkerheita som pregar Norge er eit anna aspekt som Landro og Folkeheisen Sauda AS tar på alvor.

– Den svake krona er heilt klart bekymringsverdig. Prosjektet blir dyrare jo svakare krona blir, og det må vi følge nøye med på. Vi får også håpe at rentenivået ikkje går oppover, men heller snur på sikt, avsluttar han.

(For ordens skuld: LL Ryfylke eig 13 aksjar i det lokale gondolselskapet Folkeheisen AS)