Bustyraren ønsker ikkje å ferdigstille prosjekta

Advokat Lise M. Østensjø Waage er bustyrar i konkursbuet til firmaet Byggmester Sondre Birkeland. Ho opplyser at det ikkje er aktuelt å ferdigstille byggfirmaets pågåande byggeprosjekt.

– Det er sjeldan det er aktuelt. Normalt blir det fakturert undervegs i byggeprosjekt. Da er det som regel ikkje noko å hente for buet gjennom å ferdigstille prosjekta. Bustyrar har utarbeidd oppseiingar til samtlege tilsette, og dei fleste fekk desse onsdag. Dei er sikra løn og feriepengar gjennom Nav lønsgaranti, seier Waage.

Bustyraren opplyser at det er eitt større byggprosjekt som pågår.

– Det ser ut til at dei fleste prosjekta er i ein sluttfase. Framleis er me i ein kartleggingsfase. Å gi informasjon og sikre verdiar er det me prioriterer først, seier Waage.

Ho opplyser at firmaet oppgav at dei har cirka 3,2 millionar kroner i gjeld og at det er verdiar for cirka 1,2 millionar kroner, da dei melde oppbod.

– Det gir ein underbalanse på cirka to millionar kroner. Verdiane er i stor grad mannskapsbrakker, stilas, verktøy og eit par bilar. Mesteparten av maskinparken var leasa, seier Waage.

Ho opplyser at kreditorar har ein frist på éin månad til å melde inn krav i buet.

– Nav lønsgaranti blir kreditor i buet når løn og feriepengar blir betalt ut. Nav lønsgaranti får da førsteprioritet i buet, seier Lise M. Østensjø Waage.