CO2-gjennombrot for Eramet Norway
Eramet Norway startar forsøk med koks-erstatning i ordinær produksjon i 2023. Det kan vera vegen mot betydelege kutt i CO2-utsleppa.
Like før jul kunngjorde Nærings- og fiskeridepartementet at elleve forskings- og innovasjonsprosjekt får til saman 623 millionar kroner i støtte til å utvikla klima- og miljøvennlege løysingar i næringslivet. Eitt av desse prosjekta skal hjelpa Eramet Norway til å nå eigne utsleppsmål.
Prosjektet har fått namnet Bio4Metal og skal enkelt forklart legga til rette for bruk av tremasse i staden for koks i smelteprosessen, noko som vil medføra eit kraftig kutt i utslepp av CO2-gass.
Annonse
Eramet Norway har saman med Norsk Skog Skogn AS, Rise PFI AS, Futurte Materials AS og Norsk Gjenvinning AS fått nær 40 millionar kroner i støtte frå departementet. Samla prosjektkostnad er oppgitt til 49 millionar kroner.
Gradvis opptrapping
Å ta i bruk av biokarbon som reduksjonsmiddel i smelteprosessen i staden for CO2-bomba» koks har lenge blitt sett på som ein interessant måte å redusera miljøfotavtrykket på. Kommunikasjonsdirektør Kåre Bjarte Bjelland i Eramet Norway stadfestar at dette snart vil bli ein realitet.
– Prosjektet og utviklingsstøtta dette får er eit signal om at det går framover. Det er gjort eit gjennombrot for kva type biokarbon som trengs for omnane våre. Planen er at me skal ta i bruk biokarbon, i liten skala, på ein av omnane i Eramet i 2023, seier Bjelland.
Annonse
Førebels finst det ikkje storskalaproduksjon av denne typen biokarbon. Det blir derfor lagt opp til ei gradvis opptrapping av bruken i år som kjem.
Minus 300 000 tonn CO2
Bruken av fossilt koks er i dag hovudkjelda til Eramet Norway sine utslepp av CO2.
– Me har eit mål om å erstatta minst 40 prosent av koksen med biokarbon. Dette vil gi eit kutt i CO2-utsleppet på 300 000 tonn årleg, forklarer Bjelland.
Dette tilsvarer 5,7 prosent av utsleppa til den norske bilparken (2016).
Ved å nå biokarbon-målet vil Eramet også rykka eit langt steg nærare sitt eige ambisiøse mål om 43 prosent CO2-kutt i 2030 samanlikna med 2005. I 2021 var Eramet Norway sitt klimautslepp 1,43 tonn per tonn salbar produksjon. Med 40 prosent biokarbon i staden for koks vil dette gå ned til 0,90 tonn per tonn. Målet er å nå 0,82 innan 2030.
Annonse
– Resten og vel så det vil me kunna ta med eit anlegg for karbonfangst. Me er i planleggingsfasen for eit pilotanlegg for slik fangst, opplyser Bjelland.
Eramet Norway har som mål å ha eit fullskala karbonfangstanlegg oppe og gå i 2028.
Parallelt med utviklinga av sjølve fangsten, har smelteverket i Sauda inngått eit samarbeid med tunge næringsaktørar på Haugalandet med tanke på transport og lagring av den fanga CO2-gassen.
– Det er tidlegare slått fast at det kan vera vanskeleg å skaffa nok biomasse, er dette framleis ei relevant problemstilling?
– Det er framleis relevant, ja, og mykje av bakgrunnen for Bio4Metal-prosjektet, forklarer kommunikasjonsdirektør i Eramet Norway, Kåre Bjarte Bjelland.
