Damenes aften: – Følger suksessoppskrifta

Sjølv om arrangementet Damenes aften berre varar i nokre timar ein fredag ettermiddag, har arrangementet for mange blitt ein fast saudatradisjon, enten ein deltar for å sette i gang med julehandelen, eller berre for å møte venninner på byen.

Linda Dolmen har vore ein viktig del av organiseringa av Damenes aften i ei årrekke. Ho fortel til Ryfylke at arrangør Sauda Handelsforening ikkje har sett nokon grunn til å gjere endringar til årets utgåve av Damenes aften, førstkommande fredag. Kvifor endre ei suksessoppskrift?

– Vi følger suksessoppskrifta, for vi har sett at folk storkoser seg. Vi startar med mannekengoppvisninga på Folkets Hus, slik vi gjorde i fjor, fortel Dolmen til Ryfylke.

Trekk premiar

Dolmen og Sauda Handelsforening har hatt solid oppslutning blant butikkane i sentrum, som har utvida opningstider, pynta og sett opp eigne tilbod og kampanjar for Damens aften år etter år. Dei som handlar i butikkane under arrangementet, får også mulegheit til å vinne premiar.

– Butikkane opnar slik som vanleg, rett etter mannekengoppvisninga. Når folk handlar, får dei skrive namnet sitt på kupongar, og blant desse trekk vi ut masse flotte premiar på Folkets hus etter at butikkane har stengt for kvelden, fortel Dolmen til Ryfylke.

– Fullt i fjor

For mange saudabuar har Damenes aften blitt ein populær ute»-kveld, med godt besøk på både restaurantar og pub. Dolmen fortel til Ryfylke at det etter kvart også har blitt ein dag som hyttefolket markerer på kalenderen.

– Vi ser at det er veldig mykje hyttefolk som kjem i butikkane denne dagen, og det er ekstra kjekt. Det er spesielt mange venninnegjengar som tar turen frå hyttene. Damenes aften er blitt eit arrangement som mange har glede av. Når det gjeld billettar til mannekengoppvisninga, var det fullt i fjor, så det kan vere lurt å sikre seg litt på førehand, seier Dolmen til slutt.