Dei tilsette kjøper heile industribedrifta

Industribedrifta Weldone er 75 år i år. I nær 20 år er det Paul Rune Engebretsen som har eigd godt over 90 prosent av bedrifta. Engebretsen har pensjonert seg, men er framleis styreleiar.

– Det er ei tid for alt. Eg har vurdert sal av Weldone nokre år. Eg har tre barn, men dei har sine jobbar, sine aktivitetar og bur ikkje i Sauda. Ønsket mitt er at Weldone fortsatt skal vere eit lokaleigd selskap, seier Engebretsen.

Selskapet har i dag 52 tilsette. Ifølge Engebretsen er det ingen lokaleigde bedrifter som har hatt så mange tilsette over så lang tid i Sauda, som Weldone har hatt.

– Noko av grunnen til det er at bedrifta har hatt lokalt eigarskap frå dag éin, seier den avtroppande bedriftseigaren.

Engebretsen opplyser at det har vore forskjellig vurderingar når det gjeld sal av bedrifta.

– Men når me har jobba fram ei vilje og interesse blant dei tilsette til å ta over, så er det ei god løysing. Det er ei betydeleg verksemd. Eg er veldig takknemleg for folk at lokalt her ønsker å videreføre den. Dei bruker sine eigne penger for å støtte sin eigen arbeidsplass.

Travle tider for banken

Dagleg leiar Ole K. Abotnes opplyser at hovudinteresse til dei 18 tilsette som kjøper opp heile bedrifta er å trygge og bevare eigne arbeidsplassar.

– I tillegg sikre at eigarskapet forblir lokalt, seier Abotnes.

Han opplyser at dei 18 tilsette vil eige mellom tre og ti prosent av aksjane, og at den formelle overtakinga av eigarskapet skjer 31. august i år.

Da journalisten antyder at dei 18 tilsette må ha skaffa ein del kapital for å kunne kjøpe ei heil industribedrift, smiler den daglege leiaren.

– Banken har hatt mykje å gjere den siste tida!

Ifølge Abotnes representerer dei 18 tilsette både ulik alder og ulike avdelingar ved bedrifta.

Han synest det er imponerande at så mange tilsette velger å ta opp lån når det er høge renter og dyre tider, for å sikre sin eigen arbeidsplass.

– Det er heilt fantastisk, seier Abotnes.

Roser Engebretsens vilje

Han rosar samtidig Paul Rune Engebretsen for at han har vist vilje til å la dei tilsette få kjøpe opp industribedrifta, og at han har vore opptatt av at bedrifta fortsatt skal ha lokalt eigarskap.

– Paul Rune har vist vilje til å få til ei lokal løysing. Det er ikkje sjølvsagt det, seier Abotnes.

Engebretsen erkjenner at det blei litt gi og ta i forhandlingane.

– Begge partar har måtte tilpasse seg. Ingen har fått det som dei ville, smiler Engebretsen, og konstaterer at da kan kanskje begge partar likevel vere fornøgde.

Ser gode framtidsutsikter

Ole K. Abotnes synest timinga for handelen er bra.

– Det er gode framtidsutsikter for bedrifta og marknaden. Samtidig har me lagt bak oss krevande tider med Covid og skyhøge straumprisar.

Engebretsen synes det er godt å skulle sleppe ansvaret med å eige bedrifta, nå når han har pensjonert seg. Han legg ikkje skjul på at det har vore mange tøffe tak opp gjennom åra, men konstaterer at bedrifta har klart seg bra dei siste åra, sjølv i krevande tider.

– Men samtidig er det vemodig å selge. Eg er meir eller mindre fødd inn i denne bedrifta. Offisielt så begynte eg å jobbe her i 1968. Det er 55 år sidan, seier Paul Rune Engebretsen.