– Dette er heilt topp! Eg har gleda meg lenge!

– Me burde sikkert målt temperaturen i vatnet, meinte Tommy Listøl då arrangørane i Sauda Seven Summits stod klare med både varm gløgg og pølser på SI-glass-stranda like før klokka 14 nyttårsaftan.

– Eller så bryr me oss ikkje om vasstemperaturen, kjem det frå medarrangør Bente Årthun.

– Eg vil gjetta 4-5 grader, kanskje. Eg målte på hytta for litt sidan, då var det åtte grader og dette er kaldare, slo Svein Inge Birkeland fast.

– Me har Baywatch»-melodien klar på lydanlegget, for å setta stemninga, opplyser Årthun muntert.

Med lett regn, to varmegrader i lufta og ikkje så mykje meir i fjorden, var det gjerne ikkje venta så mange nyttårsbadarar til SI-Glass-stranda laurdag ved middagstid.

Det viste seg imidlertid raskt at bålpanne og servering slett ikkje var rigga opp fånyttes.

– Driitkaldt, men godt

I det klokka nærmar seg 14 er strandområdet fylt opp med både badarar, om lag 40 i talet, og endå fleire skodelystne. Fem over to strøymer badefolket uti. Somme i sommarleg badetøy. Andre med ullbol og stilongs. Og lue. Ikkje heilt Baywatch», kanskje, men musikken frå den kjende 90-talsserien var i alle fall på plass.

– Det var driitkaldt. Men nå gjer det bare godt, konkluderte Tommy Listøl i bar overkropp ei lita stund etter at badet er unnagjort for hans del.

Litt lenger borte er Liv Rike på veg til damegarderoben», ein grøn lavvo.

– Dette er heilt topp. Veit du, eg har gleda meg slik til dette, seier ho fornøgd.

Ein annan fornøgd nyttårsbadar er Hovlandsnuten Opp-general Per Inge Fjellheim.

– Fytti, det var kaldt. Men heime står badestampen klar, oppvarma til 40 grader, det skal bli herleg å synka ned i den nå, slo den spreke 66-åringen fast.

Årets nyttårsbad var det første i regi av seven summits-gjengen og i så måte meir som eit prøveprosjekt. Rundt 100 frammøtte, med smått og stort, ber bod om at dette fell i smak.

Ekstra lukkelege?

Kuldesjokket ein utset kroppen for ved eit kaldt nyttårsbad kan verka positivt både for blodtrykket og forbrenninga. I tillegg frigjer det eit fyrverkeri av endorfinar, også kalla kroppens eige morfinstoff». Dette har både smertelindrande og antidepressiv verknad.

Så det var gjerne ikkje heilt tilfeldig at alle badarane på SI-Glass-stranda såg så glade ut…