Difor bør du mate småfuglane

No om våren er mange småfuglar opptekne med å finne mark og insekt som dei skal fôre ungane sine med. Frø og annan mat som fugleforeldra finn på fuglebrettet, treng dei gjerne sjølv, skriv forskning.no , så det er difor god grunn til å halde fram med fôringa om våren.

Ny forsking frå Lunds universitet i Sverige viser også at fôring om vinteren gjer fuglane friskare. Småfuglar som får frø eller kan ete på talgbollar om vinteren, treng ikkje å bruke så mykje energi på å få bukt med infeksjonar.

Småfuglar senkar den nattlege kroppstemperaturen sin med fleire grader om vinteren for å spare energi når det er kaldt. Men om fuglane blir utsette for ein infeksjon, er den første reaksjonen til kroppen å heve kroppstemperaturen. Det heng ikkje så bra i hop. Den svenske studien viste at fuglar som vart mata om vinteren, ikkje trong å senke kroppstemperaturen om natta like mykje som fuglar utan tilgang til mat. Grunnen var at dei hadde samla nok energi til å klare seg gjennom ei vinternatt med litt høgare kroppstemperatur.