DSB vil at vi skal klare oss utan straum i ei veke

Sidan 2018 har rådet frå styresmaktene vore at ein bør kunne klare seg utan straum i tre dagar. No kan tidsramma bli utvida.

Direktør Elisabeth Sørbøe Aarsæther i Direktoratet for samfunnstryggleik og beredskap (DSB) seier til TV 2 at det er på tide å vurdere rådet på nytt.

– Det har skjedd mykje sidan 2018, og derfor ser vi no på desse råda på nytt, seier ho.

I eit forslag som no er sendt ut på høyring, tilrår DSB at talet på dagar folk skal ha eigenberedskap for blir auka til sju.

– Viss krisa først rammar, kan det vere litt lite med tre dagar. Då tenkjer vi at éi veke er rimeleg å kunne be moderne hushald om å bidra til beredskapen i samfunnet, seier Aarsæther.

Blant dei viktigaste råda ho trekkjer fram er å sørgje for å lade opp mobiltelefonen når det er varsla ekstremvêr. I tillegg må ein ha nok mat og vatn.

Også oppvarming er viktig, og DSB-direktøren beklagar at ikkje fleire har høve til vedfyring.

– Men det finst heilt fine, godkjende små varmeomnar som går på parafin eller gass, minner ho på.

(NPK)