– Eg hugsa at folk bua og var negative til det eg sa, men eg fekk jo rett då…

Hallgeir Langeland (66)

Før: Engasjert SV-politikar med hyppige besøk til Sauda.

Nå: Engasjert SV-politikar med færre besøk til Sauda. Og ungdomsskulelærar og styreleiar i Naturvernforbundet i Rogaland.

Kva gjer du nå?

Eg jobbar som lærar på Austbø ungdomsskule på Hundvåg. Eg var faktisk med å starta denne skulen i 1987. Her har eg vore både lærar, rådgivar og avdelingsleiar. Eg kom tilbake hit etter 17 års permisjon i 2014. Eg stortrivst med å jobba med ungdom. Eg er 66 år, og så lenge ungdommane held ut med meg så blir eg. Eitt år til? Ja, minst! Eg underviser i samfunnsfag, KRLE og arbeidslivsfag. Eg bur i ei blokk på Bekkefaret i Stavanger. Her har eg budd sidan 1984. Eg er styreleiar på sjuande året i Naturvernforbundet i Rogaland, og medlem i bystyregruppa til Stavanger SV.

Kva hugar du best frå Sauda?

Fleire ting: 1. Då eg delte ut æresmedlemsskapet i Rogaland SV til Klara Tveit på årsmøtet i Nye Folkets Hus i 2020. Ho er ein bauta for oss! 2. Då eg jobba ei veke på skift på smelteverket sommaren 1999 – og heldt på å svima av fordi eg gløymde å drikka vatn. Eg hadde sagt at smelteverket hadde mykje å gå på når det gjaldt straumsparing, det var derfor eg jobba der den veka. Det var nyttig for meg å sjå korleis det var å jobba skift ved eit smelteverk. Eg fekk ikkje akkurat applaus for meiningane mine, men eg følte at eg fekk retta fokus mot dette med straumsparing, og i ettertid har det blir jo faktisk blitt gjort ein del grep når det gjeld straumsparing. 3. Då eg fekk bank» på Folkets Hus på slutten av 1990-talet, fordi eg ikkje ville bygga ut fleire fossar i Sauda, og fordi eg sa at det ville bli vanskeleg å behalda krafta lokalt og at Elkem ville selga seg ut. Eg hugsar at folk flest» i Sauda var positive til kraftutbygginga og at me i SV var nokså åleine. Eg hugsa at folk bua og var negative til det eg sa. Men eg fekk jo rett då.