Eirik Daniel Fatnes til direktørjobb i næringslivet

– Det sat litt langt inne å søka på ei stilling så kort tid etter at eg begynte i Eramet igjen, men stillinga var for spennande til at eg kunne la vera, seier Eirik Daniel Fatnes.

I dag, torsdag, blei det offentleggjort at han blir den nye direktøren i kraftselskapet A/S Saudefaldene. 38-åringen startar i stillinga 1. september.

Var kommunalsjef

Eirik Daniel har ei mastergrad i prosessteknologi, pluss leiarutdanning. I april 2020 forlot han Eramet og smelteverksbransjen for å bli kommunalsjef næring og samfunn i Sauda kommune. I tre år var han dermed del av leiargruppa i kommunen, og han var også konstituert kommunedirektør eit drygt halvår. I januar i år sa han opp den kommunale stillinga si for gå tilbake til Eramet, der han hadde fått tilbod om stillinga som prosessjef. Han starta i Eramet like over påske. I mai blei det klart at Saudefaldene-direktør gjennom 15 år, Svein Ilstad, hadde sagt opp stillinga si for å bli regiondirektør i Statkraft.

Gav godt inntrykk

Det var over ti søkarar til direktørstillinga, ifølge styreleiar i A/S Saudefaldene, Thomas Peter Vaale Ljungquist.

– Me var spente på kor mange som ville søka på denne stillinga. Det var forholdsvis mange søkarar, ja. Me ønska at den som fekk jobben anten budde i Sauda frå før av eller var villig til å flytta til Sauda. Samtidig var det viktig at vedkommande hadde erfaring innan HMS og hadde leiarerfaring, fortel Vaale Ljungquist.

Saudefaldene har nytta seg av rekrutteringsbyrået Human as. Styreleiaren fortel at Eirik Daniel Fatnes gjorde eit svært godt inntrykk i heile tilsettingsprosessen.

– Eirik Daniel har god erfaring som leiar både frå Eramet og frå kommunen. I tillegg har han gjort eit godt inntrykk, noko me også har fått bekrefta gjennom innhenting av referansar. Me har veldig tru på at Eirik Daniel er ein god mann for Saudefaldene. Det er elles så klart leit at Svein Ilstad sluttar. Han har gjort ein god jobb for Saudefaldene over mange år, seier Vaale Ljungquist.

Klar for utfordringar

Eirik Daniel Fatnes, som for tida ferierer på Fyn i Danmark, skal jobba hos Eramet ut august.

– Det blir spennande å jobba i kraftbransjen. Eg er alltid klar for nye utfordringar og liker å læra nye ting. Eg trur dette blir gøy, seier han.

AS Saudefaldene har i dag 35 tilsette. Selskapet har hovudbase på Vangnes i Sauda. Kraftselskapet driv sju kraftverk med tilhøyrande overføringsanlegg, 14 demningar og tilhøyrande luker. Normal årleg kraftproduksjon i Saudefaldene er 1810 GWh. Dette tilsvarer cirka 1,5 prosent av Norges totale kraftproduksjon.