Eit stort steg nærare gondolbane i Svandal

Fredag er det styremøte i Ryfylkefondet. I innstillinga til møtet blir det anbefalt at styret vedtar å gi 15 millionar kroner i støtte til gondolbane, som er planlagt frå nedre del av skisenteret og opp til Djuvsbotn.

Totalt er gondolbane opp til Djuvsbotn kostnadsrekna til 90 millionar kroner, inkludert prosjektering og grunnarbeid. Dersom styret i Ryfylkefondet vel å følge administrasjonens innstilling til møtet, betyr dette at Ryfylkefondet tar nær 20 prosent av rekninga med å bygge ein gondolbane i Svandal. Tidlegare har lokalt næringsliv, hytteeigarar og privat næringsliv lova ti millionar kroner til prosjektet. Sparebankstiftelsen Sauda har så langt bidratt med tre millionar kroner, men har signalisert at dei er positivt innstilt til å bidra med meir etter kvart. Det er også lagt opp til at ein prosentdel av kvar hyttetomt som blir selt nær skisenteret skal gå til Folkeheisen.

Dersom Ryfylkefondet fredag bidrar med 15 millionar kroner betyr dette at ein viktig del av økonomien i prosjektet begynner å kome på plass.

Viktig for heile regionen

I styrepapira til fredagens møte i Ryfylkefondet står det at Ryfylkefondet bør støtte Folkeheisen. Grunngivinga er at ein gondolbane ved Sauda Skisenter ikkje bare vil vere viktig for reiselivet i Sauda, men også for reiselivet i Ryfylke-regionen.

Ein gondolbane vil løfte Sauda og Sauda Skisenter som reisemål, både sommar og vinter, og gjere det meir attraktivt for turistar å besøke Sauda og Ryfylke-regionen. Det blir også peika på at dette vil også vere attraktivt for turistar frå utlandet.

Stiller krav om fullfinansiering

I Djuvsbotn er planen at det skal bli lagt til rette for aktivitetar heile året. I sin søknad til Ryfylkefondet opplyser Folkeheisen AS at eit nettverk av bedrifter lokalt jobbar med realisering av nye aktivitetar i Djuvsbotn-området.

Administrasjonen til Ryfylkefondet anbefaler at styret stiller som krav at det må dokumenterast fullfinansiering av gondolbanen før pengane frå Ryfylkefondet blir utbetalt, og at alle kommersielle avtalar må bli vurdert opp mot konkurransevriding.

Slik ser Folkeheisen AS for seg at gondolbane opp til Djuvsbotn blir finansiert: