Ekstremvêret Amy: Måtte rive stort telt på Rådhusplassen – Betongklossane svevde i lufta

Ekstremvêret Amy trefte Sauda hardt natt til laurdag. Ei rekke trer blåste ned i heile kommunen, og diverse privat infrastruktur som søppelkassestativ og liknande har fått hard medfart. På grunn av haustferie sette Sauda Ferie & Fritid opp festivaltelt på Rådhusplassen.

– Teltet skule tåle 28 meter vind i sekundet, opplyser Nils Jarle Sandanger i Saude Utvikling, som driftar Sauda Ferie & Fritid.

Teltet var sikra med ei rekke store betongelement.

– Det var meldt mindre vindkast enn 28 meter i sekundet. Me trudde telte ville stå trygt med all sikringa, opplyser Sandanger til Ryfylke laurdag morgon.

Men dette skjedde ikkje. Vinden tok tak i teltet på Rådhusplassen i løpet av natt til laurdag.

– Da betongelementa svevde éin meter over bakken tok me ikkje sjansen lenger, opplyser brannsjef Inge Seim til Ryfylke laurdag morgon.

Brannvesenet stengte av Sauda sentrum på grunn av fare for at teltet kunne fly av gårde i vindkasta og gjere skade.

– Me bestilte ein entreprenør og gav beskjed om at at teltet måtte rivast og sikrast av omsyn til sikkerheta, seier brannsjefen.

Teltet er nå fjerna.

Nils Jarle Sandanger i Sauda Ferie & Fritid opplyser til Ryfylke at dei nå må sjekke ut korleis ulike arrangement må gjennomførast på Rådhusplassen gjennom haustferien.

– Nå i dag, laurdag, var det ikkje planlagt arrangement i festivalteltet, men neste helg skulle teltet bli brukt til Bønder i byn»-arrangementet. Me må nå finne ut korleis dette arrangementet skal bli gjennomført. Detaljane har me ikkje nå, laurdag morgon. Det må me komme tilbake til, seier Sandanger.