Elin (44) skal leia intro- og flyktningtenesta
Janne Eikevik går til ny jobb på Sauda vidaregåande skule. Elin Bryne tar over jobben hennar i kommunen.
– Eg har takka ja til stillinga, seier Elin Bryne, som fekk tilbod om stillinga i sist veke.
Elin Bryne er utdanna allmennlærar med tilleggsutdanning. I tillegg har ho gått eitt år på BI, der ho har tatt økonomi og leiing. Ho har jobba som lærar i vaksenopplæringa sidan august 2016. Før dette jobba ho fleire år på Sauda ungdomsskule.
Annonse
Det var sju søkarar til stillinga som avdelingsleiar for introtenesta og vaksenopplæringa, då fristen gjekk ut 1. mars.
– Me hadde fem personar på intervju. Det var gode søkarar, og me er godt fornøgd med at me har kunna tilby jobben til Elin Bryne, fortalde kommunalsjef oppvekst og kultur, Målfrid Selvik Årthun, til Ryfylke i sist veke.
Janne Eikevik har jobba i Sauda kommune sidan 2001. Ho starta ved Risvoll skule, og begynte i vaksenopplæringa i 2011. I 2015 blei ho avdelingsleiar for vaksenopplæringa, og sidan 2020 har ho vore avdelingsleiar for vaksenopplæringa og introduksjonstenesta. 1. mai startar ho i ny jobb som rådgivar ved den nye vaksenopplæringsavdelinga ved Sauda vidaregåande skule.
