Else (54) er open om sin kamp mot kreften

– Eg gleder meg veldig! Eg har aldri gjort noko slikt før, men eg føler meg veldig trygg i meg sjølv, og er klar for å vera veldig open og privat, seier Else Dahl-Olsen.

I august i fjor blei 54-åringen ramma av brystkreft. I dag er ho friskmeldt.

Fullt hus

Det er fagforbundet Sauda som står bak arrangementet i Nyesalen i kveld, der privatpersonen Else Dahl-Olsen og kommune-psykologen Karoline Lian vil halda kvar sine innlegg med fokus på psykisk helse, livets utfordringar og korleis takla desse. Fagforbundets Siv Jørgensen fortel om ein stor interesse for arrangementet.

– Me har alltid eit slikt årleg arrangement, men me har ofte slitt med å få 50 publikummarar. Nå, måndag morgon, er alle dei 130 plassane fyllt opp, seier ho fornøgd.

Målet til Fagforbundet er å retta fokus mot det stadig meir aktuelle temaet, psykiske helse.

Starta med genfeil

Dei fleste kjenner Else Dahl-Olsen frå Sparebanken Vest, der ho i ei årrekke var rådgivar, før ho blei avdelingsbanksjef i 2011. I dag er ho tilbake i rolla som finansiell rådgivar, i redusert stilling. I kveld er ho klar for ei heilt ny rolle – der ho byr på seg sjølv, heilt privat, framfor ein fullsett sal i Folkets Hus. For livet har servert Else Dahl-Olsen mange utfordringar dei siste 15 åra. I 2006 fekk ho påvist den livsfarlege mutasjonen i BRCA-1-proteinet, også kalla rogalandsgenet». Dei som får påvist denne genfeilen har auka risiko for å utvikla brystkreft og eggstokk-kreft. I løpet av to år var Else Dahl-Olsen gjennom fleire operasjonar. Ho takka nei til psykologhjelp, fordi ho meinte ho ikkje trengte det og ho var ivrig og utolmodig på å forsetta det travle livet litt.

– Men i 2012 møtte eg veggen, fordi eg ikkje hadde fått bearbeida alt eg hadde vore gjennom i samband med genfeilen. Eg var sjukemeldt i eit heilt år, fortel ho.

Utfordringar i kø

Ho valde på denne tida å utdanna seg innan nevrolingvistisk programmering (NLP), som blant anna handlar om mental trening og mindfulnesss. Ho fortel om at ho då lærte seg teknikkar for å stå i vanskelege livssituasjonar og korleis takla utfordringane utan å gå til grunne. Og utfordringane stod i kø for Else Dahl-Olsen i den komande perioden. I 2018 blei dottera Elin Alvorleg sjuk, samtidig med at mannen Egil også fekk påvist sjukdom, men begge blei friske etter behandling. Så, i slutten av august i fjor oppdaga Else ein liten kul i det eine brystet.

– Kun tre prosent av dei som får påvist genfeilen og som tar alle dei førebyggande operasjonane som eg gjorde, får brystkreft. Eg er ein av dei, seier Else enkelt.

16 sterke cellegiftkurar og ein operasjon måtte til før Else blei erklært kreftfri i mars i år.

I september var ho tilbake på jobb og ho jobbar nå foreløpig i redusert stilling.

Ulike livskriser

Føredraget som Else Dahl-Olsen skal halda i kveld har fått namnet Livets meny».

– Eg vil snakka om livskriser. Livskriser er ikkje nødvendigvis bare sjukdom, det kan vera økonomiske vanskar, gamle og sjuke foreldre, dødsfall, barn som flyttar heimanfrå eller barn som flyttar heim igjen. Det siste opplevde eg. Det kan faktisk opplevast vondt og vanskeleg når livet ikkje blir heilt slik ein har sett føre seg og planlagt, seier ho.

54-åringen presiserer at ho absolutt ikkje sit på fasiten på korleis ein skal takla utfordringane livet byr på.

– Alle må finna sin veg. Eg kan bare fortella kva som fungerer for meg, seier ho.

Ho trur at hennar nye måte å tenka på kan ha bidratt til at ho blei såpass fort frisk som ho gjorde.

– Det er så lett å tenka Kvifor meg? Dette er urettferdig. Det er så synd på meg». Det er naturleg å tenka dette, men det hjelper ingenting. For meg blei det viktig å fokusera på det positive, eg sette meg små mål og jubla for dei små sigrane, fortel ho.

Viktig med openheit

For henne har det også vore både godt og viktig å vera open og ærleg om dei vanskelege tinga.

– Då eg var sjuk var målet mitt å gå ut i frisk luft kvar dag. Det å møta på folk og snakka om det gjorde godt. Så klart, nokre gonger blei eg veldig tappa for energi viss eg måtte snakka om dei vanskelege tinga, men som oftast klarte eg å fokusera på det positive, og det gav meg energi og krefter, fortel ho.

Viktig livserfaring

Livets meny er også namnet på enkeltpersonføretaket Else Dahl-Olsen har oppretta. Ho ser føre seg at ho gjerne kan halda fleire føredrag, vera ein samtalepartnar for folk i kriser, eller dra på bedriftsbesøk eller besøka skular og barnehagar.

– Det er så viktig å ha fokus på den psykiske helsa vår. Når kriser oppstår er det kor god psykiske helse me har som blir viktigast, ikkje kor fysisk spreke me er. Kor godt rusta er me når livets overraskelsar kjem bardust på? Den livserfaringa me opparbeider oss gjennom livet må me bruka for å tola dei vanskane livet byr på, seier ho.

Målet for kvelden er å gi folk noko å tenka på.

– Det er opp til kvar enkelt å finna sin måte å takla livet på. Eg håpar at eg, med å fortella om mine livserfaringar, kan hjelpa nokon til å få det betre, seier Else Dahl-Olsen.