Sintef-forskarane Henning Taxt (t.v.) og Magnus Askeland ser for seg ei meir heilskapleg delingsordning – ei energisamfunnsordning – som gir insentiv og fordelar for energisamfunnet heile året, ikkje berre når det finst lokal kraftproduksjon.
Sintef
Energisamfunn kan løyse fleire utfordringar i straumnettet
1. oktober trer det i kraft ei ny delingsordning for eigenprodusert, fornybar straum. Den legg til rette for at straumkundar i burettslag, fleirmannsbustader og næringsbygg kan dele på straumen dei sjølv produserer, til dømes frå solceller.
Med denne ordninga slepp bebuarane nettleige og avgifter for forbruk av den eigenproduserte straumen, skriv Sintef i ei pressemelding
– Denne forskriftsendringa lèt kundar samarbeide på tvers av målepunkt innanfor ein avgrensa del av straumnettet. Ordninga gir insentiv til dei som får solproduksjon til å bruke mest mogleg av denne energien sjølv i dei timane det er høg produksjon. Det er bra for nettet og gjer det lettare å ta imot solkraft, seier Henning Taxt, forskingsleiar i Sintef Energi.
Taxt meiner det ligg mange unytta moglegheiter i slike ordningar for samarbeid lokalt.
– Vi meiner at det er større moglegheiter ved å vidareutvikle ordninga slik at ho i endå større grad kan vere med på å avlaste straumnettet vårt, også når det er høgt belasta vinterstid, seier Taxt.
Om denne typen ordning blir utvikla på ein god måte vil det gagne alle – også straumkundar som ikkje produserer eigen straum – fordi behovet for utbygging av nettet ikkje blir så stort. Det er positivt for nivået på nettleiga.
(NPK)
