Eramet får 132 millionar kroner til energi- og klimaprosjekt i Sauda

Eramet Norway Sauda skal bygga verdas første energigjenvinningsanlegg der ovnsgass frå manganlegeringsproduksjon skal omdannast til elektrisk og termisk energi i tillegg til CO2. I tilknyting til energigjenvinningsanlegget skal det også etablerast eit pilotanlegg for testing av karbonfangst.

Enova støttar satsingane med 132 millionar kroner, går det fram i ei pressemelding.

Vellukka test

Det største prosjektet skal gjenvinna energien frå omnsgassen ved smelteverket. I dag blir det meste av denne gassen brent i ein fakkel over omnshustaket. Eit pilotprosjekt der gass har blitt brent i ein gassmotor har vore vellukka, og den eine motoren vil nå få selskap av ytterlegare seks motorar.

Fullskalaanlegget er venta å produsera rundt 90 GWh elektrisk energi i året, om lag like mykje som går til alminneleg forbruk» i heile Sauda.

Enova støttar gasskraft-prosjektet med 97,2 millionar kroner.

Karbonfangst-pilot

Enova gir også 34,6 millionar kroner i støtte til eit pilotanlegg for karbonfangst. Eksosgassen frå energigjenvinningsanlegget har ein CO2-konsentrasjon på 20-25 prosent. Dette gir nye mulegheiter for reduksjon av utsleppa frå smelteverket som årleg slepper ut om lag 350 000 tonn CO2.

Pilotperioden er stipulert til eitt år og eit framtidig fullskala karbonfangstanlegg vil kunna fanga 80-90 prosent av dette, melder Enova.