Etablerer kulturråd i Sauda: – Vil styrke oss
For å rekke betre ut lokalt i distrikta, vil Rogaland musikkråd etablere lokale råd – blant anna i Sauda. Det meiner kulturskulerektor Eli-Jorun Tangeraas vil styrke mange delar av kulturlivet i Sauda.
I dag, måndag 19. mai, møtast aktørar i kulturlivet i Sauda og Rogaland musikkråd på Folkets Hus for å planlegge den vidare prosessen med å etablere Sauda kulturråd, ein forlenga arm av Rogaland musikkråd. Rådet skal vere talerøyret for kulturlivet og sikre medverknad i kulturpolitikken, heiter det i ei pressemelding frå Rogaland musikkråd.
Rogaland musikkråd er fylkesleddet av den nasjonale paraplyen Norsk musikkråd og Musikkens studieforbund. At det blir etablert eit lokal råd for Sauda, seier rektor ved Sauda kulturskule, Eli-Jorun Tangeraas, er gode nyheiter for alle som bryr seg om bulyst og kulturlivet i Sauda.
Annonse
– I Sauda må vi ha eit godt tilbod om aktivitet også etter klokka fire på ettermiddagen. Dette styrkar oss på mange måtar, og viktigast av alt så samlar det oss og gjer oss betre kjent med kvarandre, vi som driv med ulike kulturaktivitetar eller aktivitet i andre lag og foreiningar. Når vi kjenner kvarandre betre, kan vi lettare samarbeide, seier Tangeraas.
Praktiske fordelar
Tangeraas seier at Sauda kulturråd vil vere ei samla stemme overfor ulike instansar, for eksempel i ulike søknadsprosessar om tilskot eller som høyringsinstans om det til dømes skal byggast nye lokale, der det må takast omsyn til akustikk eller andre forhold. I tillegg trur ho det vil bygge eit fellesskap med praktiske fordelar.
– Eit eksempel er Sparebankstiftelsen, som lag og foreiningar i Sauda har fått enormt med støtte frå. Det finst mange støtteordningar og mulegheiter, og med ein felles stemme og mulegheit til å få hjelp av andre aktørar i rådet, vil alle komme styrka ut, seier Tangeraas.
Annonse
Ho trur også på fleire positive synergiar ved eit kulturråd i Sauda.
– I tillegg til å gi støtte til den lokale kompetansehevinga, vil kulturrådet kunne styrke inkluderinga og rekrutteringa i lag og organisasjonar. Ulike aktørar kan også lettare dele utgifter og arbeid knytt til for eksempel bruk og lån av utstyr. Om fleire kan dele, reduserer vi også avtrykket på miljøet. Det er også positivt, seier ho.
