Firmaet Byggmester Sondre Birkeland er konkurs
– Me har meldt oppbud på grunn av likviditetssituasjonen. Det er eit slag i trynet, seier Sondre Birkeland.
Firmaet Byggmester Sondre Birkeland, som blei oppretta i 2016 og har elleve tilsette, har i løpet av sju driftsår gjennomført mange byggeprosjekt i Sauda. Men firmaet hamna tidleg i ein situasjon der eigenkapitalen blei brukt opp. Etter dette har firmaet over fleire år kjempa ein lang kamp for å få drifta i pluss. I 2020 fekk dei retta opp mykje med eit godt driftsår, men driftsåret 2021 sette firmaet tilbake igjen. Aksjonærane gjekk inn med meir pengar som lån til firmaet for å berge drifta. Sondre Birkeland er majoritetseigar med 70 prosent av aksjane. Vegard Ringhagen har 30 prosent av aksjane.
Sondre Birkeland medgir det er med tungt hjarte dei må gi opp nå.
Annonse
– Me har møtt ein vegg. Me har meldt oppbud på grunn av likviditetssituasjonen. Nå er det opp til bustyrar kva som skjer vidare, seier Birkeland.
Har ingen planar vidare
Birkeland synest det er trasig for dei tilsette og for alle kundane.
– Ein del byggeprosjekt er nesten ferdige. Andre prosjekt har me nettopp begynt på, eller me er midt i prosjektet, opplyser Birkeland.
Annonse
Han opplyser at intensjonen ikkje er å slå firmaet konkurs for så å starte opp igjen.
– Det er skuffande at me ikkje klarte å få det til. Nå har eg ingen planar framover. Den einaste planen eg har nå er at eg skal gå på ski, seier Sondre Birkeland.
Han opplyser at dersom det er byggeprosjekt som skal avsluttast så er det opp til bustyraren å ta stilling til dette, og at byggfirmaet ikkje kan bestemme dette nå.
Bustyrar i innleiande fase
Det er advokat Lise M. Østensjø Waage som er oppnemnt som bustyrar i konkursbuet. I ein kort kommentar til Ryfylke onsdag formiddag opplyser Waage at ho ikkje har så mykje informasjon nå, og må få tid til å skaffe innleiande oversikt over eigendelar og pågåande prosjekt i byggmeisterfirmaet.
