Fleire huseigarar er klare for å leiga ut til ukrainarar på flukt

– Bare den siste veka har fem-seks huseigarar tatt kontakt og tilbyr seg å leiga ut bustad til urkainarane som kjem til Sauda som flyktningar. I tillegg er me heile tida i kontakt med andre lokale huseigarar, fortel Janne Eikevik, leiar for introduksjonstenesta i Sauda kommune.

Ventar på eritrearar

Før krigen i Ukraina braut ut og sendte over to millionar ukrainarar ut på flukt var planen at Sauda kommune skulle ta imot og busetta 16 flykningar i 2022. Ein familie frå Kongo kom til Sauda i vinter, og introduksjonstenesta ventar nå på to familiar frå Eritrea.

– Alt er klart, og dei skulle komma om få veker. Men UDI har varsla oss om at det er problem med å reisa ut frå flyktningleiren dei oppheld seg i, i Etiopia. Derfor er det blitt forsinkelsar, seier Eikevik.

Kartlegg sengeplassar

Samtidig skal den kommunale introduksjonstenesta nå busetta flyktningar frå Ukraina. Kva tid desse kjem til Sauda er foreløpig uklart, men det kan skje når som helst.

Eikevik og hennar medarbeidarar jobbar med å få kartlagt bustader og tilgjengelege sengeplassar.

– Me har tilbod om både hus og leilegheiter. Me er klare, og gler oss til å hjelpa dei som kjem, seier Eikevik.

Treng klede

Introduksjonstenesta leiger i hovudsak møblerte bustader. Men ifølge Eikevik er dei fortsatt avhengig av dugnadsviljen og givargleden til saudabuen når det gjeld klede og anna utstyr.

– Me treng alltid klede, spesielt regnklede og varme klede. I tillegg er det alltid behov for handkle og sengetøy, fortel ho.

Arbeid og integrering

Alle som kjem som flyktningar til Sauda tar del i introduksjonsprogrammet, med norskkurs og integrering i norsk arbeidsliv.

– Me vil kartegga kva utdanning og yrkeserfaring dei har, og håpar at me kan få hjelp i det lokale arbeidslivet. Bedriftseigarar må gjerne ta kontakt om dei treng arbeidskraft eller ønsker å bidra i integreringa, seier ho.

Rosar dugnadsviljen

Eikevik fortel at introduksjonstenesta elles er i ferd med å inngå samarbeid med frivillige, blant dei Sauda sanitetsforening, med tanke på det føreståande integreringsarbeidet.

– Me er altså SÅ glade for den store frivillige innsatsen som finst i Sauda. Dette skal gå bra, det er eg heilt sikker på, seier Janne Eikevik.