Fleire har meir å rutte med no enn for eit år sidan, ifølgje forbrukartillitsindeksen til Opinion.
NPK
Fleire seier dei har betre økonomi enn i fjor
Det kjem fram i forbrukartillitsindeksen til Opinion for oktober. Oktobertalet enda på -12,8, som er akkurat det same som i juni.
Kvar delindeks er slik at 100 betyr at alle ventar sterk positiv endring, medan minus 100 betyr at alle ventar sterk negativ endring. Viss alle ventar inga endring blir talet 0.
– Andelen som seier at økonomien i hushaldet er betre i dag enn for eitt år sidan, har rett nok gått frå 11 prosent i januar og februar til 17 prosent i oktober, seier Henrik Høidahl, fagsjef for politikk og samfunn i Opinion.
Det er den høgaste andelen sidan sommaren 2022.
– Trenden har vore stigande gjennom året, sjølv om det går sakte oppover. Det er eit teikn på at fleire har fått reallønnsvekst og auka kjøpekraft, seier han.
Det betyr likevel ikkje at nordmenn flest har meir tru på økonomien eitt år fram i tid. I januar svarte 26 prosent at dei trudde på litt eller mykje betre økonomi om eitt år. Den andelen er uendra i oktober.
