Folk droppar biffen og vel kvitt kjøtt

Nortura ser ei stor endring i forbruksmønsteret til folk. Dei fire første månadene i år konstaterte selskapet eit fall på heile fem prosent for raudt kjøtt samanlikna med same tid i fjor. Kvit kjøtt, aukar derimot, skriv Nationen.

Konsernsjef Anne Marit Panengstuen, peikar særleg på éin ting.

– Folk vel billigare matvarer i år enn i fjor, det er ei generell utvikling i marknaden, seier ho til Nationen.

Det kan føre til at raudt kjøtt oftare taper kampen om å ta opp plass i handlekorga til kunden, trur ho.

– Kanskje er det fleire som vel raudt kjøtt sjeldnare enn dei gjorde før, som følgje av at kostnader på andre område har gått i vêret. Maten er noko mange sparer på, seier Panengstuen.

Nortura auka omsetninga med ein milliard i første tertial, og tredobla resultatet samanlikna med kriseåret 2022. Resultatet enda på 144 millionar.