Fotball: Kristiane (19) rykka opp med Bryne
Saudajenta blei Bryne-spelar i sommar. I helga var ho med då laget rykka opp til førstedivisjon. – Ein draum som er gått i oppfylling, seier Kristiane Teig.
Våren 2022 planla saudajenta Kristiane Teig å flytta til Stavanger for spela fotball for klubben Vidar, samtidig som ho var elev ved Wang toppidrett. Men etter ei treningsøkt med Vidar tok talentspeidaren til Viking kontakt, og saudajenta blei ein del av rekruttlaget til Viking. Der var ho heilt til i sommar, då ho teikna kontrakt med Bryne. Ifølge Teig hadde Bryne tatt kontakt alt i februar i år, og ytra ønske om å ha henne i spelarstallen sin.
Annonse
Frå midtstoppar til midbane
Overgangen til Bryne skjedde i juni.
– Eg kom fort inn i laget, og første kampen eg fekk vera med på var NM-kvartfinale mot toppseriemotstandar Hønefoss. Me kjempa oss heilt til ekstraomgangar og straffekonk, men tapte dessverre til slutt, fortel Teig.
Ho fortel at det var ein fin overgang å gå frå tredjedivisjonsspel for rekruttlaget til Viking til andredivisjonsspel for Bryne.
Annonse
– I Bryne er det mykje fokus på utvikling og prestasjonar. Me trener og speler kampar med GPS, slik at trenarane får vita kor mykje me spring og rører oss, kor mykje styrke me bruker og kor lang distanse me legg bak oss i kvar økt. I tillegg blir det brukt videoanalyse. Eg er nå omplassert frå å vera midtstoppar i Viking til å bli midtbanespelar for Bryne, fortel 19-åringen, som så langt har skåra eitt mål for sitt nye lag, i 2-0-kampen mot Steinkjer.
– Ein draum
Onsdag 19. november møtte Kristiane Teig og Bryne laget Kil/Hemne, som låg an til nedrykking frå førstedivisjon. Kampen enda med 1-0 til gjestane frå Kyrksæterøra. Kamp nummer to skulle etter planen bli spelt i Kyrksæterøra laurdag 22. november, men på grunn av kansellert fly blei den utsett til søndag 23. november.
– Då kampen starta leia vertane 1-0 etter sigeren mot oss tidlegare i veka. Dei klarte også å skåra eitt mål tidleg i returkampen. Etter kvart reduserte me, og det blei veldig spennande, det gjekk til ekstraomgangar og straffekonk, der me til slutt tok sigeren, fortel Teig, som ikkje rakk å ta sin straffe før kampen var avgjort.
– Å rykka opp var ein draum som gjekk i oppfylling. Eg har alltid drøymt om å spela i toppfotballen i Norge. Eg fekk også svar på at valet eg tok om å gå frå Viking til Bryne var riktig, seier ho.
Annonse
Bryne-laget reiste heim til Rogaland etter kampen i Kyrksæterøra, og fekk ein fin velkomst av Bryne-supportarar på Sola lufthavn.
– Nå ventar to veker fri før me startar med sesongoppkjøring, pluss treningsleir på Kypros på nyåret. Formen er bra og eg er frisk og skadefri, seier ho.
Etter tre år på Wang toppidrett, har ho valt å ta eitt «friår» for å fokusera på fotballen.
– Eg jobbar på Clarion hotell i Stavanger, bur på Madla og pendlar til Bryne. Planen er å studera i Stavanger neste år, og då spela 1. divisjon for Bryne, fortel Kristiane Teig.
