Full rulle for Superbasket

I 2006 stod Roald Øverland fram i media og fortalte om forretningskonseptet sitt. Han såg ein marknad for handlekorger i plast som kan trillast på butikkgolvet, og opplyste han hadde einerett på å selge eit bestemt produkt i Skandinavia. I dag er det slike handlekorger mykje brukt, både i matvarebutikkar og andre stader, men i 2006 gjekk det enten i store trillevogner i metall eller små handhaldne korger. Øverland jobba med å bygge opp bedriftskonseptet sitt for å selge dei rullande handlekorgene. Så blei det stille. Fullstendig stille.

Bedrifta hans har bygd seg opp gradvis frå da av. I 2006 var omsettinga på 1,3 millionar kroner, men alt året etter var omsettinga på sju millionar kroner. Overskotet var lite dei tre første åra og Øverland henta ut beskjedne lønsmidlar. Men i 2009 kunne han heve ei årsløn på 739 000 kroner, godt over vanleg industriarbeidarløn. Sidan har omsettinga og inntektene fortsatt å vokse. Men Øverland har konsekvent nekta å snakke med media, trass i fleire henvendingar.

God butikk

Dei fem siste åra har bedrifta hans, Superbasket International, omsett for 150 millionar kroner. Roald Øverland har i løpet av desse fem åra tatt ut 10,8 millionar kroner i løn og utbytte. I tillegg til Øverland er det kun éin merkantilt tilsett i firmaet.

Handlekorgene blir produsert i Kina og Superbasket International skal visstnok ha salskontor fleire stader i verda, men det er ingen ytterlegare informasjon å finne om fabrikken i Kina, salskontora og korleis bedriftskonseptet fungerer. På heimesidene til Superbasket International er det sparsommeleg med informasjon å finne om selskapet, bortsett frå at dei opplyser at dei på global basis er den leiande produsenten av rullande handlekorger. I tillegg kan du sjå alle handlekorgmodellane dei tilbyr. Gjennom søk på internett er det også minimalt med informasjon å finne om Roald Øverland og Superbasket International, bortsett frå historiske turnresultat av Roald Øverland. Roald Øverland var turnar på øvste nivå i Norge på 1980-talet og har fleire NM-gull. I tillegg har han fleire sølvmedaljar i nordisk meisterskap og har representert Norge under turn-EM.

Blir drifta frå Sauda

Superbasket har kontor i Skulegata. På heimesidene blir dette kontoret opplyst å vere hovudkontoret (HQ) til Superbasket International. Frå dette kontoret har Øverland styrt firmaet sitt dei siste åra. Ein periode var også firmaet registrert i Sauda, men firmaet er nå registrert i Asker kommune, nærare bestemt i ein einebustad i eit bustadfelt, som Øverland har eigd i fleire år. Kontakttelefonnummeret Superbasket oppgir er likevel eit saudanummer. Da Ryfylke for eit par månader sidan tok kontakt, presiserte Øverland gjennom ei tekstmelding at Superbasket ikkje var eit Sauda-firma lenger:

– Er det framleis slik at du ikkje ønsker å uttale deg til Ryfylke?

– Ja, det stemmer. NB! Firmaet er flytta frå Sauda sidan sist (kun regnskap i Sauda).

Men ifølge Brønnøysundsregisterets registerutskrift er ”beliggenhetsadressa” til selskapet i Skulegata i Sauda.

Superbasket har i tillegg eit lite underselskap i Sverige som dei eig 70 prosent av. Inntektene til dette selskapet er svært små. Truleg er dette lageret til Superbasket. Ifølge 2018-regnskapet er bokført verdi på varelageret på 249 000 kroner.

Investerer i eigedom

I vedtektene til Superbasket blir det opplyst at selskapet driv med ”Utvikling samt engroshandel og videresalg av plastprodukter. Herunder trillekurver, kundevogner og handlekurver i plast. Virksomheten skal videre omhandle utleie av fast eiendom.”

Selskapet har gradvis investert i eigedom og har i 2018-regnskapet bokført ”tomter, bygningar og annan fast eigedom” for 12 millionar kroner. Året før var det bokført 7,5 millionar kroner.