Godt år for hotella og ny rekord i skisenteret

Å vere reiselivsaktør har vore risikosport dei siste åra, og neppe godt for blodtrykket. Koronapandemien som braut ut i starten av 2020, og som medførte ei rekke restriksjonar for reiselivsnæringa, blei etterfølgd av skyhøge straumprisar i 2022.

Men både Kløver Hotel, Sauda Fjordhotell og Sauda Skisenter viser at dei har klart å navigere seg godt gjennom 2022. Alle tre bedriftene leverte eit driftsoverskot, til og med eit sunt og godt driftsoverskot.

Etter eit par koronaår begynner Kløver Hotel nå å nærme seg driftsinntektene dei hadde før pandemien. Fjoråret enda 1,1 millionar kroner i pluss. Eigedomsselskapet til hotellet, Nordbø Eiendom, hadde eit driftsoverskot på 2,1 millionar kroner. Eigedomsselskapet har hatt nær to millionar i pluss gjennom pandemien, men eit stort hotell med omfattande bygningsmasse bør også bygge seg opp ein del kapital i eigedomsselskapet til framtidige oppgraderingar og vedlikehald.

Fjordhotellet på veg opp

Sauda Fjordhotell begynner gradvis å finne driftskonseptet og leverte eit akseptabelt driftsresultat på ein halv million kroner i pluss i 2022. Etter nokre svært tøffe år peiker pilene opp og hotellet klarte å nå seks millionar kroner i omsetning.

Utfordringa til hotellet er at drifta og eigedomsselskapet er i eit felles selskap. Det er generert lite pengar til framtidige oppgraderingar og vedlikehald.

Skisenteret med driftsrekord

Også Sauda Skisenter la bak seg eit godt driftsår i 2022. Skisenteret blei hardt ramma av pandemirestriksjonane i 2020 og enda i dundrande underskot. I 2021 klarte dei å jobbe seg opp i pluss. I fjor var skisenteret tilbake på same nivå som sine beste driftsår. Faktisk sette skisenteret ny driftsrekord, 400 000 kroner meir enn toppåret 2018.

Driftsresultatet i driftsselskapet enda på 1,2 millionar kroner i pluss. Eigedomsselskapet enda på 0,9 millionar kroner i pluss. Sjølv om 2022 gav eit godt overskot, dekka det likevel ikkje inn underskotet frå 2020.

Campingdrift i minus

Dei nye eigarane av Sauda Fjord Camping, som overtok campingplassen sommaren 2021, midt under pandemien, har hatt to utfordrande driftsår. Campingplassen sleit med høge straumrekningar i 2022, samtidig som det tar tid for nye eigarar å bygge opp driftsnivået.

2021 enda omtrent i null, mens fjoråret gav eit driftsunderskot på 370 000 kroner. Campingplassen har også eit holdingselskap med dei same eigarane. Holdingselskapet gjekk éin million kroner i minus i fjor. Eigenkapitalen i holdingselskapet er to millionar kroner i minus.

På den positive sida klarte driftsselskapet å auke inntektene frå 3,2 millionar kroner i 2021 til 3,8 millionar kroner i 2022. Omsetningsmessig er det likevel eit stykke opp til dei beste driftsåra til campingplassen i Saudasjøen.

Felix debuterte i pluss

Den forholdsvis nye restauranten Felix, som delvis er ein reiselivsaktør, har fått ein god driftsstart. Restauranten opna dørene i mai 2022, og drifta ut året enda med 327 000 kroner i pluss. Bedrifta hadde ei omsetning på 3,6 millionar kroner i løpet av dei åtte månadene dei var i drift i fjor.

Kraft Kafe har lagt bak seg eit nytt driftsår som gjekk omtrent i null. Restauranten som held til i kulturhuset har slitt med å skape driftsoverskot og drivaren avsluttar drifta ved nyttår, da han føler all jobbinga i stor grad blir dugnad. Kraft Kafe hadde ei omsetning på 5,1 millionar kroner i 2022. Det er 0,2 millionar kroner ned frå året før. Rekna om i 12 månaders drift hadde Felix høgare omsetning enn Kraft Kafe i 2022.

Låg timebetaling

Og det er nettopp dette som er utfordringa til reiselivsnæringa i Sauda. I forhold til antal arbeidstimar som blir lagt ned i bedriftene i løpet av eit år, er lønsutgiftene bemerkelsesverdig små. Sjølv om mange kan ha ei tilnærma normal årsløn, er ikkje løna i samsvar med antal arbeidstimar som blir lagt ned. Timeløna blir derfor låg, og det er tydeleg at det å jobbe med reiseliv er ein livsstil der ein ikkje kan telle arbeidstimar.

At ein liten restaurant som Felix har eit driftsresultat på 327 000 kroner på botnlinja er bra, men botnlinja fortel ikkje at to stillingar til saman mottar éin million kroner i løn. Når restauranten har ope 63 timar i veka, er timebetalinga langt under det normale, og antal arbeidstimar langt over det normale.

Eit stort hotell som Kløver som har drift 24 timar i døgnet heile året, hadde samla 3,1 millionar kroner i lønsutgifter i 2022. Sauda Fjordhotell hadde 2,5 millionar kroner i lønsutgifter. Her er det drivarar som legg ned ekstremt mange arbeidstimar som ikkje viser igjen på lønsbudsjettet. Heller ikkje Sauda Skisenter veltar seg i lønsfest. Ingen av desse aktørane har tatt ut utbytte dei to siste åra.

Nordbø Eiendom

Sauda Fjordhotell

Sauda Fjord Camping

Camping Sauda Holding

Sauda Skisenter

Sauda Skitrekk

Kraft Kafe

Felix