Hege Økland ny toppleiar i Iverson eFuels
Blir leiar både for ammoniakkfabrikkprosjektet i Sauda og selskapet Hy2gen Norge AS, som er ein av eigarane av prosjektet.
Hege Økland har fått jobben som toppleiar i Iverson eFuels og Hy2gen Norge AS. Ho vil dermed vere øvste leiar for ammoniakkfabrikketableringa i Sauda. Dei siste ti åra har Hege Økland bygd opp og leia klyngeorganisasjonen Maritime CleanTech, og har hatt ei sentral rolle i fleire maritime samarbeidsprosjekt. Når det gjeld fabrikkplanane i Sauda, startar ho i jobben med stor optimisme.
– Eg gler meg til å leie dette prosjektet med desse partnarane som alle har ein sterk vilje og evne til å lukkast med å bidra til det grøne skiftet i skipsfarten. Det foregår ein storstilt utvikling i skipsteknologien for å kunne bruke ammoniakk som drivstoff. No gjenstår det å få på plass leveransen av drivstoffet som sjølvsagt må vere karbonfritt, seier ho i ei pressemelding tysdag.
Annonse
Økland vil som leiar av selskapet Hy2gen jobbe med å vurdere nye lokasjonar i Norge for fleire satsingsprosjekt innan grønt drivstoff.
– Vi vil etablere oss på lokasjonar saman med lokale og internasjonale samarbeidspartnarar der vi ser en vilje til å legge til rette for nye grøne industriarbeidsplasser, slik vi ser i Sauda, seier ho.
