Her er dei to nye flyktningkonsulentane

– Eg gler meg stort, men det er med litt blanda følelsar. Eg trivst jo så godt i den jobben eg har i dag, seier Hulda Asgeirsdottir Birkeland.

Har sagt opp

Ho er i dag dagleg leiar ved F&R Treningssenter, og har nå sagt opp denne stillinga for å begynna som flyktningkonsulent i Sauda kommune. Ho startar i den nye jobben alt 1. mai.

– Det er krevande tider, også for treningssenterbransjen. Me har vore igjennom ein langvarig pandemi, samt generelle auka kostnader som også blir merka i vår bransje, seier Asgeirsdottir Birkeland, som har vore dagleg leiar ved treningssenteret sidan vinteren 2019.

Ifølge Asgeirsdottir Birkeland vil Merel Dirksen fortsetta i ein rolle som driftsleiar ved treningssenteret.

35-åringen er utdanna fysioterapeut. I perioden hausten 2015 til februar 2017 jobba ho som tiltakskonsulent i Sauda mottakssenter, selskapet Hero sitt asylmottak i Sauda. Her likte ho seg svært godt.

– Det er kanskje litt klisjé å seia det, men eg liker å hjelpa menneske. Det er noko eg brenn for, og som eg synest er givande, seier ho.

Har permisjon

Den andre nye flyktningkonsulenten som nå er tilsett er Renate Oxaal Havreberg.

Ho er utdanna førskulelærar med spesialpedagogikk, og har jobba i barnehage i 13 år. Dei siste 6,5 åra har ho jobba i Veslefrikk barnehage i Åbøbyen. Då det i vinter blei lyst ledig stillingar som flyktningkonsulentar i kommunen, valde ho å søka.

– Dei siste åra har eg jobba som ressurspedagog i barnehagen, der eg har hatt en variert jobb, som primært inneheld arbeid med språk, men også oppfølging av nye flyktningar. Det har vore eit veldig kjekt arbeid. Det er grunnen til at eg fekk lyst til å søka jobb som flyktningkonsulent, forklarer Havreberg.

Veslefrikk barnehage i Åbøbyen er den lokale barnehagen med desidert flest flyktningbarn. I 2016-2017, då Sauda hadde asylmottak, hadde også barnehagen ei eiga avdeling med barn frå flyktningfamiliar. Renate Oxaal Havreberg har fått to år permisjon frå stillinga si som førskulelærar for å jobba som flyktningkonsulent. Ho begynner i den nye jobben sin 1. juli.

– Det er ikkje eit enkelt val å skifta jobb når ein har ein jobb ein trivst godt i. Men eg gler meg til å prøva noko heilt nytt og spennande, seier Havreberg.

Det var 13 søkarar, ni kvinner og fire menn, som søkte på stillingane som flyktningkonsulentar.

Hulda Asgeirdottir Birkeland og Renate Oxaal Havreberg blir kollegaer med Van Franciose Murekatete, som har jobba som flyktningkonsulent i Sauda i litt over eitt år nå. Deira næraste sjef blir nytilsette Wendy Pettersen, som i vår startar i jobben som leiar for introduksjonstenesta og vaksenopplæringa.