Salet av fersk fisk har gått nedover den siste tida.
NPK
Høge prisar trugar salet av fersk fisk
Matvareprisane aukar stadig, og nokre av varene som har auka mest i pris er fersk fisk og kjøtt. Det har ført til konsekvensar for salet av fisk, skriv
NRK Nordland.
Tal frå Norgesgruppen viser at salet av sjømat har falle 13 prosent hittil i år, men det er nedgangen i salet av rein fisk som gir størst utslag, seier kommunikasjonssjef Kine Søyland i Norgesgruppen til NRK.
Nordmenn erstattar lakse- og aurefileten med meir prosesserte fiskeprodukt som fiskekaker- og pudding. Slike produkt har selt 20 prosent meir i same tidsperioden, medan fersk fisk har gått ned kring 25 prosent, ifølgje Norgesgruppen.
Dei same tendensane kjem fram både hjå Coop og Noregs sjømatråd. Høgare pris gir lågare sal.
– Samstundes ser vi at frosne laksefiletar har hatt ein liten prisnedgang, og ein auke i salet på over 20 prosent, påpeiker Eivind Hestvik Brækkan, sjømatanalytikar i Sjømatrådet.
Det er likevel utfordrande å seie noko om nedgangen i salet vil få store konsekvensar for norsk sjømatnæring.
