Fredag gjekk 1251 medlemmer i Akademikerne og Unio ut i streik etter at meklinga med staten ikkje førte fram. Måndag blir streiken trappa opp.
Ei rekke etatar og verksemder blir omfatta, og blant delane av staten som blir hardast ramma, er justissektoren, skriv Dagens Næringsliv.
– Det vil ramme pass, etterforsking og førebyggjande i politiet, seier leiar Unn Alma Skatvold i Politiets Fellesforbund.
Fleire departement, Noregs vassdrags- og energidirektorat, Skatteetaten, høgskular og universitet er blant dei som blir ramma.
Fare for at streiken kan bli langvarig
Akademikerne og Unio meiner at avtalen staten la på bordet, ville gitt medlemmene dårlegare vilkår.
Det store striden har vore om det skal vere éin felles eller to ulike hovudtariffavtalar i staten. I tillegg har auka kjøpekraft vore eit klart krav i lønnsforhandlingane, skriv E24.
Akademikerne og Unio har ønskt å halde fram med to avtalar, men staten og dei to andre fagforeiningane LO og YS ønskjer seg ein likelydande avtale for alle.
– Det som skil seg ut med denne streiken, er at det her er veldig prinsipiell usemje. Det gjer at det no kan bli vanskelegare å semjast og finne eit kompromiss enn det vanlegvis har vore, nettopp fordi det er meir prinsipielt, seier Fafo-forskar Kristin Alsos.
Ho trur derfor at det er fare for at streiken kan bli langvarig.
Politiet på feriebemanning
I politiet rammar streiken mellom anna fleire politidistrikt, passkontor, utrykkingspolitiet, Kripos og Økokrim.
– Påtalekapasiteten vil vere redusert under streiken, noko som kan gå ut over etterforsking og rettsforfølging av straffesaker, opplyser Oslo-politiet i ei pressemelding.
Politiets Fellesforbund opplyser til Dagens Næringsliv at dei somme stader er nede på nivå med feriebemanning. Samtidig er dei opptekne av at det ikkje skal oppstå fare for liv og helse.
– Tek vi for mykje av beredskapen – dei som skal rykkje ut når nokon ringer 112 – så blir streiken avblåsen før han omtrent har starta. Streiken skal merkast, men det skal ikkje vere fare for liv og helse. Det er ikkje farleg å ikkje få pass, seier leiar i Politiets Fellesforbund, Unn Alma Skatvold.
Kan ramme eksamen
Ved Universitetet i Bergen blir 118 tilsette tekne ut i streik frå måndag.
– Det samfunnsvitskaplege fakultetet og det humanistiske fakultetet blir ramma, det er teke eit stort jafs av begge fakulteta. Dette vil truleg ramme eksamen, sensur og tilsetjingsprosessar, seier rektor Margareth Hagen til Bergensavisen.
– Det er vanskeleg å ha oversikt over nøyaktig korleis det vil ramme. Studentane som blir ramma av dette, får informasjon så fort som mogleg, seier Hagen.
Også ved Oslomet, og Universiteta i Oslo, Bergen, Stavanger og Søraust-Noreg blir ei rekke tilsette tekne ut i streik.
Redusert kapasitet
I Mattilsynet vil 220 medlemmer bli tekne ut i streik. I ei pressemelding opplyser dei at brukarane deira kan merke redusert kapasitet på utferding av eksportattestar både for sjømat og anna mat, eksport av landbruksmaskiner og attestar som trengst ved reise med hest.
Også grensekontrollstasjonen på Oslo hamn får redusert kapasitet for behandling av grensekontrollpliktige varer frå tredjeland inn til Noreg.
Fleire departement
Finansdepartementet, Landbruks- og matdepartementet, Arbeids- og inkluderingsdepartementet, og Samferdselsdepartementet er også ramma av Akademikernes uttak.
Her blir mellom anna lovarbeidet, budsjettarbeidet og arbeidet til regjeringa med stortingsmeldingar forseinka, skriv E24.
Ein langvarig streik kan påverke revidert budsjettprosessen. Det seier kommunikasjonssjef i Finansdepartementet, Tor Borgersen, til Altinget.
Budsjettforslaget er til behandling på Stortinget, og streiken inneber at departementet vil ha lågare kapasitet til mellom anna å svare på spørsmål om budsjettet.
(NPK)
