Idrettslaget vurderer å starte med SFO

– Sauda idrettslag har fått innspel lokalt om det kan vere aktuelt at me startar opp ei SFO-ordning i Sauda. Det er ein del idrettslag i Norge som tilbyr dette, opplyser styreleiar Roger Birkeland i Sauda idrettslag.

Under årsmøtet i idrettslaget tidlegare i mars gav årsmøtet si tilslutning til at styret undersøker om det er marknad for dette i Sauda.

– Me vil gjere ei kartlegging først, for å sjå om det er marknad for dette i Sauda. Utgangspunktet er at dette skal vere eit supplement til dagens kommunale SFO-ordning i Sauda. Så langt det lar seg gjere vil me unngå at dette kjem i konkurranse med kommunal SFO. Men eg synest det er spennande tankar. Me har hatt ei open dialog med Sauda kommune om dette, seier Birkeland.

Aktivitet i staden for skjermtid

Birkeland trur at det er ein del barn i Sauda i dag som ikkje går på kommunal SFO, men som kan vere interessert i å gå på idretts-SFO.

– Det kan bli mykje skjermtid etter skulen for ein del barn. Kanskje eit SFO-tilbod med mykje aktivitet kan vere attraktivt, seier Birkeland.

Eit SFO-tilbod i regi av Sauda idrettslag vil ikkje vere retta mot ein spesifikk idrettsaktivitet, men ta utgangspunkt i all-idrett.

Vil trenge fleire tilsette

Han opplyser at dersom det viser seg å vere interesse for idretts-SFO så vil dette vere eit tilbod basert på foreldrebetaling, slik som dagens SFO-ordning har, og der det vil vere behov for fleire tilsette.

– Ordninga skal vere sjølvfinansierande, men me vil sjå kva støtteordningar som det er muleg å nytte seg av for å prøve å hente inn eksterne midlar, seier Birkeland.

Ikkje aktuelt i år

Han opplyser at dette ikkje vil vere eit tilbod som vil starta opp alt til hausten.

– Det er det for kort tid til. Dette er eit aktuelt tilbod for neste år. Men dersom me ser at det er marknad for å gjennomføre dette, vil det bli annonsert i god tid. Styret har fått alle fullmakter til å starte opp eit slikt tilbod dersom det er marknad for det, seier Roger Birkeland.

I tillegg til at årsmøtet har gitt sin aksept til at Sauda idrettslag startar opp ei SFO-ordning, dersom det er interesse nok for det, har også årsmøtet gitt sin aksept til at det blir tilsett ein dagleg leiar i full stilling i Sauda idrettslag. Idrettslaget tar sikte på å gjennomføre ein tilsettingsprosess slik at ein dagleg leiar er på plass i løpet av sommaren.